Nehemia-ni Dilgipa Ong·anio Chu·sokani (How Nehemiah Became a Successful in Leadership?)

1. Introduction

Babylon-ni manderangchi rim·gittanga man·e dongaoniko Jerusalemni manderangko Jerusalemona rimbadilgiparang: skanggipa: Zerubbabel (538 B.C.), gnigipa: Ezra (458 B. C.) aro gittamgipa: Nehemia (445 B.C.) ong·a. Nehemia-ni Jerusalemona sokbapilon, Jerusalem songjinma aro uni killa be·grugiminsaha. Ua namen suk ong·jaha. Ua Jerusalem songjinmako re·wilwile nienba, maikai songjinmani guareko rikpiltaigen name chanchiaha aro plan ka·aha. Ja·mano ua Jerusalem songjinmako rikpiltaiaha. Jerusalemni guare aro songjinmako rikpilanio maidake kam ka·aha, uni ga·sugipa gunrang aro dakbewalrangko ia article-o outline dake see gatataha.

2. Nehemia-ni Dilgipa Ong·ani Gunrang

1.   Nikjagringani donggipa (Neh. 2:5; 2:12; Toe Skiani 29:18)

2.    An·tangna chanchija (Neh. 5:14-15, 17; 2:5), gipinrangna simsaka (Neh. 2:17, 20)

3.    On·kanggipa (Neh. 6:2, 3)

4.    Bi·ronggipa (Neh. 1:4, 11)

5.    Toromigipa (Neh. 1:5-9)

6.    Tik ong·e ka·gipa (Neh. 3:28)

7.    Gisik ka·tong bilakgipa (Neh. 4:17:-18)

8.    Mikkang nia grigipa (Neh. 5:7-9)

9.    Ka·donggipa (Neh. 6: 11;  6:3)

10. Ka·dongatgipa (Neh. 4:14)

11. Simsakbegipa (Neh. 2:20; 4:9)

12. Manderangna ka·oksigipa (Neh. 1:3, 4)



3. Nehemia-ni Ming 14 Dilgipa Ong·ani Niamrang

1.      Isolni okamanina aganchaka (Neh.2:12b; 1:1-4).

2.      Isolni a·bakukosa kam ka·a (Neh.2:12)

3.      Bi·aniko mongsongbate ra·a (Neh.1:4-11)

4.      Cholonba mongsonggipa ong·a (Neh.2:1-8)

5.      Sakgipinni bil-ni ning·o kam ka·a (Neh.2:1-8)

6.      Champenggiparang sokbatelgen ine ma·sisoa (Neh.2:9-10)

7.      Kamko ka·chakatnasion name chanchia aro simsake tarichenga (Neh.2:11-16).

8.      Ku·monggrikaniko dake tarisoa (Neh.2:17-18)

9.      An·tang baksa team-ko bikota (Neh.2:18b; Odhai 3)

10.  Manderangna kamrangko suala aro uamangkon mitela (Nehemia 3)

11.  Champengatani bilrangni kosako Isolni bilan chegen ine ka·dongsoa (Nehemia 4)

12.  Isolnan warachakgipa ong·na on·a (Nehemia 6)

13.  Gam-o pangchakja (Nehemia 5)

14.  Kamko matchotatata (Neh.6:15-7:4)

4. Nehemia-ni Mongsonggipa Pangchakanirang

    (An·chingni janggi tanganioba uarangko ja·rikna man·gen)

i). Nikjagringani: Jerusalem torom nokko 516 B.C.-o rikpiltaiani matchotahaoba, guare-kode bilsi 70 ja·manoba rikpiltaina man·jaha; iako nikon, Nehemiani ka·tongo ka·oksiani gnang guare-ko rikpiltaina nikjringaniko done kamko ka·aha.

> Isol an·chingnaba nikjagringaniko on·e, Mondoliko rikna ka·oksianiko naatna ama. Ia nikjagringanichi, an·ching gipinrangko didina man·gen aro kamrangko damsan ka·na man·gen.

ii). Bi·ani: Neng·nikanirang sokbaon, Nehemia aro Ezra-mang sakgnian bi·ani baksa neng·nikanirangko warachakaha. Uamang Isolna je obostakoba agane on·rongaha. Uamang an·tangtango neng·nikanirangko ra·bite donja, Isolnasa galgopaha.

> Bi·anian neng·nikanirangko namatna Isolni bilakgipa bil ong·a. Bi·ani aro kam damsan re·a.

iii). Dilgipa Ong·ani: Nehemia dilgipa ong·anio chu·soksranggipa ong·a. Ua gisikni gita Isol baksa ong·an baksa simsakbee tarisoa (planning), rikrima (teamwork), neng·nikaniko namata (problem solving), aro kamko matchotatna ka·donga. Ua bebera·anio bilakan baksa agitchae kam ka·aniko dake namgipa dilgipani kamko ka×na amgipa ong·a.

> Dilgipa ong·na donako man·aniara an·tangko niksengatani, nama gadangko man·ani, dal·ampa dakani ong·ja. Dilgipa ong·anio tariani, rakbee kam ka·ani, ka·dongani, aro chakchikani dongna nanga, aro Isolni katako ba dilaniko knatimronggipa ong·na nanga.

iv). Neng·nikanirangko Ame Donani: Kamko ka·na a·bachengon, Nehemia ka·dingstekani, chonnikani aro ka·mikenatanirangko  chagronga, aro nangtingdrikanirang nakata, indiba pilak neng·nikanirang Nehemiani kamko matchote ka·ako dontongatna man·jaha.

> Neng·nikanirang sokbaon, bilgrina altua indiba ma·sibo, neng·nikanirangko amanggijade mukutko man·ani dongja. Neng·nikanrangko ame donangesa kamko matchotatna nanga.

v). Gisik Pil·ani ba Tangchapiltaiani: Isol Nehemia-mangna guareko rikpilna on·oba, uamangko gisikni gita namatchenggijade guareko matchotatna man·jawachim. Ezra Isolni katao manderangko ma·siate on·aha aro manderang an·tangtangni paprangko ra·chakaha aro gisik pil·aha.

> Paptangko ma·simangmangani chu·ongja; gital ong·piltaiani dongna nanga jean ka·oksianiko ong·katata.

5. Dakna Mangsongani

Ia kan·dikbegipa article-ko poraie, na·a da·alo Nehemia-ni dilgipa ong·anio maikai chu·sokna man·aha uko skie man·aha ong·ode, nang·ni janggi tanganio aro dilgipa ong·e kam ka·anio maiko dakna mangsonggen? Nang·ni dilgipa ong·e kam ka·mitingo, nang·naba rakbegipa a·sel obostarang aro champenganirang sokbanaba donga, na·a Nehemia-na Isolni dakchakaniko gisik ra·e nang·ni kamko dondikgija ka·ange matchotatgenma?

Neng·nikanirangde asol neng·nikani ong·ja ine na·a ma·sibo. Neng·nikanirangde nang·ni kamko bilakbate ka·na dakchakengasa ine ra·bo, unon nang·ni kamko na·a chu·sokatna man·gen.

About Author

Sengban M Momin is an author who formerly worked as a pastor in two churches for 10 years. He has a passion for God’s mission and love to share the Word of God. He has authored few books in his own language (Garo) including his best book Isolni Ka·saae Jokataniko Bebera·e Janggi Tangani (Living by Faith in God’s Gift of Salvation). He presently lives with his wife and a daughter in Tura, Meghalaya, India.