Chu·sokgipa Dilgipani Ming Sni Dakrong-Bewalrang (Seven Habits Of Effective Leaders)

Na·aba chu·sokgipa dilgipa ong·na skama? Bang·bata dilgiparangan ka·na dongimin ka·anirango chu·sokna ska indiba dilgipa ong·anio chu·sokna skani dongrongja. Je gadango ong·a, uanon ong·e dongna skaia aro badia altua ukon ka·e dongna namnikbataia. Indiba an·chingni Isolde nang·ni aro angni dingtange (nambatrikrike) kam ka·aniko nangnika. Jedake Isol an·tangni kattarangchi an·chingni gisikko mikaororoata ua gitan an·chingni kamrangkoba baririkrikata. Isolni kamrangko nambate ma·siroroon an·chingni dai-rangba apalrikrika. Ian namgipa chol ong·jama?

Chu·sokgipa dilgiparang maiko ka·ronga, na·a chanchie niahama? Uamango an·chingni ka·rongbewalna bate maiba dingtangtee ka·anirang dongchongmota. Hai an·ching iano uamangni ming sni dakrong-bewalrangko chanchie nina.

 

1.  Ka·sogipa (Proactive)

Chu·sokgipa dilgipade ka·sogipa ong·a. Ka∙sogipa ine aganon, ka·cheng dakchenggipana bate ka·so-daksogipa ong·aniko miksonga (it means more than taking initiative).  Jinmani kamoba, pilak manderangna skangan ua an·tang gisiktango chanchisoe ka·na kragipa kamrangko ka·sogipa ong·a. Ka∙sogipa dilgipani cholon bewalrangara uni basee kam ka∙na changani giminsa ong∙a. Unigimin ua je a·sel-obostaoba, a·sel obostako matnangja(pa·sikja) indiba daiko u∙ie namako aganchakna ama. An·tangni gisik ka·tongni nangnikaniko chu·sokatanina bate maia namgniko ra·bara ukosa ua ka·rongbata.

·        Ka·sogipa dilgipade a·selko sandie bichal ka·gipa ong·ja, ua manderangna seng·aniko ra·bagipasa ong·a.

·        Ua nirikie nama namjako aganronggipa ong·ja, ua dakmesokaniko on·gipasa ong·a.

·        Ua neng·nikaniko ra·bagipani dolo napja, ua neng·nikaniko namatgipani dolosa napa.

Maikai an·tangko tarigen?

1.     Ka·chengna aro dai-ko ra·na mangsongani dongna nangchongmota

2.     Gisikni skanina bate gamchataniko dal·bate ra·bo

3.     Obostarangchi salangako man·na nangja

4.     Nang·ni chanchianio aro gisik-o sronggipa ong·jringgipaong·bo

5.     Nang·ni cholon bewalko sadikatna on·nabe

6.     Nang·ni gisikni skaniko ra·rikbo

7.     Minggipin kam ka·ani cholrangko am·sandibo

8.     Kamko ka·na aro maikoba gitalko dakna tik ong·gipa somaiko nisengbo

9.     Watgale galana bate maikoba dakna basebo

10.Draae dakako man·nana bate maikoba dakna mikpakma nibo

Bible Example: Nehemia be·grugimin Jerusalem guare-ko riktaipilna gita be·grugimin guare-ko re·wilwile name nichengaha, uko riktaipilna man·genma man·jawa name chanchiaha aro maidake kamko a·bachengo namgen, pilakni gitan ua tarisamsoaniko an·tangna dakchengaha. Ja·mano uni kam ka·aniko niaton, champenggipa aro neng·nikanirang sokbaoba, kamko name ka·e matchotatna man·aha.

Jinmao jekoba chanchirime kam ka·na ine mamungkoba an·tangna tarisoani dongjaode, jinmao nambatgipa chanchie tik ka·aniko dakna man·jawa.

 

 

2.  Bon·chotao Ong·gnigipa Bimangko Mikkango Done Kamko A·bachenga (Begin With The End In Mind)

Chu·sokgipa dilgipade bon·chotao ong·gnigipa bimangko mikkango done kamko a·bachenga. Ua je kamko ka∙on, kamko a∙bachengna skangan name chanchichenga, aro uni kamko ka∙ani bonchotao mai ong∙gen ua name noksa/bimangko (complete picture/image) u∙ichenga. Bon·kamani noksa-ko done a·bachengaonin kamko ka·on, na·a da·o bano uko ma·sina ama aro bachi maiko dakangna nanga dilaniko man·a; badiako ka·na nangchongmotgipa ong·a ukoba ma·sie ka·na man·a. Kam ka·anio jakchakjanaba donga, choligipa ong·naba donga, indiba chu·sokgipa ong·nade bon·kamani noksako done a·bachengna man·osa ong·a; kamko ka∙ani namgni aro namgijanirangkoba u∙ininggipa ong∙a. Uni u∙ininganichi a∙bachengaoni bon∙chotaona name kamko ka∙e matchotatna man∙a.

Maikai an·tangko tarigen?

1.     Nokdango chu·sokgipa ong·chengbo

2.     Mamung saloba kakket ong·aniko olgrokatnabe

3.     Bichal ka·na skang dol gnichinikon knatimchengbo

4.     Knalni kamko da·alan tarisobo

5.     Namgipa/ong·gipa ong·aniko rakkibo

6.     Bil·si bil·dak dakatnabe

7.     Isolni dakchakaniko am·rongbo

8.     Manderangni bak ra·paaniko gisik ra·bo

9.     Sakgipinrangni ku·patianiko ra·bo

10. Kakket ong·e ka·bo, indiba chanchining·e

11. Ka·dingatgipa ong·bo

12. Gualanina kennabe

13. Badita agana ua gitan changni chang knatimgipaba ong·bo

14. Minggipin kamna jajrengsonabe, nang·ni change sapanirango bimchipbo

Bible Example: Nehemia Jerusalem guare-ko riktaipilon, maidakgipa bimango matchotatgen uko name gisiko noksako donsochengaha.

Jisu nok rikgipa mandeni gimin agana, jean namedake chanchichengesa an·tangna nokko rika.

 

3.  Skanggipako Skang Done Kam Ka·a (Put First Things First)

Chu·sokgipa dilgipade skanggipako skang done kam ka·a. Uo kam ka·na nanga bang·e dongoba, kamrangko somai gita matchotatna man·a; maina ua skang ka·na nanggipa ba mongsonggipa kamrangko ka·chenge gipin bangki kamrangkoba ka∙na man∙a. Ua kamrangko bil·si bil·dak dakatja, ukoba iakoba dake ka·brinbrinja; mingsa mingsa dake kamko ka·e matchotata. Ua salantian kamko name changa.

·        Ua kamrangko somaini kri aro nangchongmotani kri sualna changa.

Maikai an·tangko tarigen?

Nang·ni ka·chengna nangchongmotgipara badia uko na·an tik ka·bo.

Na·a ka·dongani gnang gisik ka·sroke aro ku·si ong·e ka·bo.

 

4.  Cheani/Cheani ba Mamung Ku·rachakgrikani dongja (Win/Win or No Deal)

Chu·sokgipa dilgipade cheani/cheani ingipako ranta ka·a. Cheani/Cheani (anga chea/na·aba chea) ingipara maia? Ian dilgipa aro unbaksa ka·rimgipa dol gninan namgni ong·aniko miksonga. Je kamko ka·on, dol gninan namgni donga aro chu·ongnikani donga. Iano susaani dongja, indiba bakrimani donga.

Mamung ku·rachakgrikani dongja inani miksonganiara an·ching maiba kamko ka·o, chu·sokatna man·jaoba, dilgipa aro unbaksa ka·rimgipa dolgninan namgni ong·aia ine ra·ani ong·a. Chong·motan, darangkoba matnangani dongja. Kamo chu·sokjahaoba, dolgnian namgrike donga. Ian dol gnini gisikkon jakgitel ong·ata, maina darangkoba draani dongja, an·tangni skako chu·sokatelna nanga ineba ong·ja;  kam ka·rimgipaba jakgitel aro matnangani dongja.

Maikai an·tangko tarigen?

·        Cheani/cheani (angaba chegen/na·aba chegen)-ko nisan done kamko ka·bo, maibakae kam chu·sokjaoba, mamung ku·rachakgrikani dakjawa (no deal) ine ma·sigrikbo.

·        Namgni donggijagipa kamko ka·na chanchie dongdamnabe.

 

5.    Ma·sichengna Ska, Uni Ja·mano Ma·sigipa Ong·a (Seek First To Understand, Then To Be Understood)

Chu·sokgipa dilgipade ma·sichengna ska, uni ja·mano ma·sigipa ong·a.Ua skie ra·aniko dontonggijagipa ong·a. Ua an·tangko ma·sinikgipa ong·ja, indiba Isolni gisikni dilanio ma·sibatrikrikangna ska. Ua je obostao aro kamoba (pilakni giminan) ma∙sie ra∙chengna ska, aro skie ra∙aba ra∙a. Ua ma∙sigijako ma∙sia dakmikgipa ong∙ja. Ua kattakon name knachenggija ma·sisoa dakgipaba ong·ja. Ua an∙tangan ma∙sigipa ong∙chenge pilak kamko ka·on altua aro chu∙sokgipa ong∙a.

Maikai an·tangko tarigen?

·        Nang·ni gisiko uko ba iako ba gimikon ma·sitokaiade ine chanchinabe, ning·tubate aro apalbate ma·sie ra·na nangani dongangkuaigen ine ma·sibo.

·        Isolba nang·na salsao gimik seng·aniko on·jawa aro nang·na gimikko parape·jawa ine ma·sibo.

·        Name dake knatimchenggipa ong·bo aro ma·sichengna jotton ka·bo.

·        Knatimon, ma·sina inesa knatimno, aganchakna ine knatimnabe.

·        Isolni parape·anide nang·nasan ong·ja, sakgipinrangnaba ong·a ine ma·sibo.

·        Skie ra·aniko watgalnabe.

 

6.  Gipinrangming Bakrime Kamko Ka·a (Synergetic)

Chu·sokgipa dilgipade gipinrangming bakrime kamko ka·a.Saksan kam ka∙o, ka∙sina aro bang·gijasan kamrangko matchotatna man∙a, indiba sakgipinrangko ku×monge kamko ka∙on, ta∙rake aro bang·bate kamrangko matchotatna man∙a.

Manderangmung ku·monge ka·on, dilgipa an·tangba neng·gokna nangja, sakgipinrangba an·tangtangni bak dongpaani gimin kam chu·sokon kusi ong·a.

Pangsa bolko ge·ana bate, pang gni bol-ko sepanggrike ge·o bol-ni ja·dilrang wen·binggrike a·a-ko mangrakata aro bol-ba mangrakbate dal·roroa.

Wa·al so·on, am·bol ja·sako so·aiode, kamningja aro maibakai kamoba rang·san siaigen, indiba am·bol ja·gni ba ja·gittamko so·ode wa·al ching·ninga aro ching·e dongkamgen.

Maikai an·tangko tarigen?

·        Bakrime kam ka·anio, an·ching saksa sakgipin-ni dingtanggrikgipa chanchiani, gisikni kam, aro dakbewalrangko gamchate ra·na nanga.

·        Manderang jeni giminba je gita ong·a uan ong·a ine chanchijawa, an·tangtangni ma·sia gitasa ra·gen aro chanchigen ine ma·sibo.

·        Unigimin saoba nangbaksa melijaoba, na·a aganna indake aganna man·bo, “Nama! Na·a iako dingtang dake ma·sia.”

·        Na·a uamangni chanchia ba ma·siako an·tango ra·chakna nanga iade ong·ja, indiba uamang jeko chanchia aro ma·sia uko ra·chakbo.

 

7.  An·tangko Wil·a (Sharpen The Saw)

Chu·sokgipa dilgipade pangnan an·tangko wil·a.Kamko ka×o ta∙rake aro name ka∙na man∙nade, matsramgipa ong∙na nanga. Jekai bol ratgipa an·tangni korat-ko mate wil·e donronga, jechi ua bolko ra·ton ta·rakbate ratna man·a aro uni bil neng·a komia.

An·tangko wila inon, ian an·tangko gital gital ong·ataniko miksonga. Iano ming bri an·tangko wil·jringna nangani donga, jekai, be·en-ni gita, gisikni gita, chanchiani gita, bakrimani gita.

Maikai an·tangko tarigen?

·        Be·eni gita gital gital ong·jringatnade be·enni nanganina cha·aniko cha·na, chu·onge nengtakna aro bilakatna ranta (exercise) ka·na nanga. Be·en mangrakosa jeko ka·oba altuae ka·na man·a.

·        Gisikni gita gital gital ong·jringna salanti Isolo bi·jringna aro Isolni kattarangko poraie chanchibewalna nanga. Gisikko gital gital ong·atjringanichi dilgipa ong·anio tanganiko on·a, bilakaniko on·a, nambate dangdike on·na gisiko nangatako man·a aro on·kangtaitaina man·a.

·        Gisikni chanchianiko gital gital ong·jringna sea jotanirangko porairongna nanga.

Wil·gija donchipgipa atte je kamna jakkalnaba cholija, uandake dilgipa an·tangko tarijaode je kamoba cholijawa aro chu·sokjawa.

Dilgipade Isolni kattako poraijringe, Isolo bi·jringe dongan baksa skie ra·aniko dontongna nangja. Iarangan an·tangko wil·rongani chol ong·a.

 

Bon·kame Aganani

Ia chu·sokgipa dilgiparangni ming sni dakbewalrangko poraie nang·ni gisiko maiaba mikaoniko man·ahama?  Na·a ia ming sni-oniko badiakoba an·tangna nangnike nikahama? Anga bebera·a, na·a maiobade dingtangtelaha. Na·a chu·sokgipa dilgipa ong·na an·tangko tarina jotton ka·na skengahama? Oe, Isol je kamko (na·a da·o dilgipani kamko ka·enggipa ong·ode) ka·enga, uano nang·ni chu·sokgipa ong·aniko nangnika. Nang·ni apsan apsan ong·e donganiko nangnikja. Isol an·chingko a·gilsako janggi tangna on·engon, maikobade nambate a·gilsakna ka·e donanganiko nangnika. An·ching sakantian an·tangni bil gita chanchiode, chu·sokgipa ong·na amjawa, indiba Isolna an·tangtangko on·kangode, Isolni dakna amgijani mamungba dongja. Badita an·ching Isolna an·tangtangko on·roroa ua gitan Isol an·chingko jakkalrikrikna man·a. Isol nang·ko dilangchina angni ska aro bi·a.

About Author

Sengban M Momin is an author who formerly worked as a pastor in two churches for 10 years. He has a passion for God’s mission and love to share the Word of God. He has authored few books in his own language (Garo) including his best book Isolni Ka·saae Jokataniko Bebera·e Janggi Tangani (Living by Faith in God’s Gift of Salvation). He presently lives with his wife and a daughter in Tura, Meghalaya, India.

Dilgipa Ong·anio Chu·sokgipa Ong·na Tariani (Preparing to be an Effective Leadership)

Dilgipa ong·ani altuagipa kam ong·ja. Dilgipani kam namna nangasan ong·ja, uni gisik aro cholon bewal aro changa sapanirang ja·rikgiparangna bate nambatgipa ong·na nanga. Indiba pilakni gitan chu·soke namgipa dilgipako banoniko man·na amgen? Mingsa kamo name dakna man·oba, minggipinon name dakna man·ja. Indake ong·engon, ja·rikgiparanga bang·a aro uamang sakprakprakni nangnikanirang rokom rikit, aganan changpiljawa. Sakprakan an·tangtangni namnika aro nangnika gita re·dilakosa name nika.

Mande sakantini nanganiko ba namnikaniko on·na man·gipa dil·gipakode, saksa dilgipani janggi tangaoniko nikna neng·a. Maina Isol dilgipa sakprakna gisikni gun aro changa sapanirangko bang·gijasan on·aia (I Kor. 12:31; 2 Timothyna 1:6), ua on·gimin gun aro changa sapanio pangchake kamkoba ka·china bilko on·aha. Unigimin Isolnade Uni on·gimin gun aro changa sapaniko name gisik nange ka·jokon chu·ongbejok.

Dilgipa ong·anio chu·soksranggipa ong·nade man·jawa, indiba chu·sokgipa ong·na jotton ka·anirangde dongna nangchongmota. Anga iano ming 12 dilgipa ong·anio chu·sokani cholrangko me·soke on·enga. Jekoba basee nang·ni dilgipa ong·anio ja·rike nina man·gen. Haida nang·na nambegipa dakchakani ong·naba donga.

 

1.   Dingtangatna Man·ani (Flexible To Change)

Kam mingsako ka·engon, ua kamko ka·a bijangchi ong·mitingo, a·bachengani somaio dongipa nikjagringaniko dingtangatna nangainaba donga; kamko ka·angengmitingo nambata kam ka·ani cholrang sokbanaba donga (ua dingtangataniara sakgipinni chanchiaoni ong·bo ba an·tangoni ong·bo), ua indakgipa gital cholrangko ra·chakna amaniko ‘Dingtangatna Man·ani (Flexible to change)’ ine agana.

Flexible ong·gipa dilgipao kamko ka·na dingtang dingtang cholrang sokbaia ine bebera·ani donga; indakgipa gisik dongachi kamrangko nambate ka·e chu×sokatna man·a.

@ Ua an·tangan an·tangko dingtangatna on·gipa ong·a. An·tangni ma·siao ba gun ba changa sapao pangchakdugaja. Kamko chu·sokatna je chol sokbaa uko dakna ua jechakja.

@ Dakbewalo jujaatna an·tangko on·bo. Jinmani kamo maiba gital nambata dakbewalba sokbana chol donga ine u·ibo.

 

2.   Sualgrike Ka·gipa (Shared)

Dal·gipa nikjagringani ba kamko ta·rakbate aro nambate chu·sokatnade bang·a dilgiparang aro bak ra·giparangko nanga; uamang me·a aro me·chik, kangal aro man·e cha·a, skia pora man·a aro man·ja pilakon man·gopa. Skanggipa chasongni dilgiparang uamangni kamrangko sualgrike Nama Kattako gipatanio ta·rake, nambate ka·aha.  Jisu Kristoba sninggiparangmung pangnan Nama Kattako aganprakaha. Ua sninggiparangko sakgni gni dake watate kamrangko ka·ataha aro chu·sokgipa ong·aniko me·sokaha.

Sualgrike Ka·gipa-o: 

@ Damsan ka·rimani donga

@ Ua an·tangan niroke kam sualna changgipa ong·a

Sualgrike Ka·anichi Nambatgipa Chu·sokanirang:

· Saksan ka·gipana chang gni bade chu·sokatna amani donga

· Bang·bata biteko nange on·a

· Bil, tangka aro sason ka·ani-na mikpakma nianiko gelna man·a.

· Neng·nikanirangko dakchakgrike chelchakna man·a

Dal·a chu·sokaniko nikna skode, sualgrike kam ka·bo. Unon na·a nang·ni chanchisoana batpile chu·sokaniko nikgen.

 

3.  Ku·monge Ka·ani (Ecumenical )

Dingtang dingtang dilgiparang baksa ku·monge ka·anichi dal·gipa kamko chu·sokatna ama. Ia ku·monge ka·ani miksonganiara Isolni songnokko rikani aro apalatani kamna ong·na nanga. Ia nisanko done pilak rokom aro mondolirangni dilgiparang ku·monggrike ka·na man·a. Jisu Kristoni Johan 17-o bi·gipa kattarangba bebera·giparangni ku·monge ka·ani gimin bi·aha. Bang×a rokomoni chimonggimin ong·oba aro bebera·ani rokom aro ranta ka·anirango dingtanggrikoba, Jisu Kristoni mondolini kamko ka·anio ku·mong nangrimachi Kristianni gamchatani aro kakket ong×aniko  bilake rakkiangna amgen.

@ Saksa sakgipinni dakbewal aro kamrangko jegija, basee ra·gipasa ong·bo. Jeani jegrikaniko ong·katata indiba ku·mongani bang·a kamko chu·sokata.

 

4. Nikjagringani Gnang Kamko Ka·ani (Vision, Mission And Goal Oriented )

Chu·sokgipa dilgiparang ka·sogipa (proactive) aro mikkangchiko niksogipa ong·a. Ua indakgipa dilgipa nikjagringanichi a·bachenga. Ia nikjagringaniara ua aro uni dol maiko dakbaengaha ba dakenga uko rongtale nikatan baksa mikkangchiko nikatsoaniko on·a. Uamangni kam ka·ani somaio neng·nikanirang sokbaoba ia nikjagringanichin didianiko man·ronga.

Ia nikjagringaniko kam ka·aona sokataniko mission ine agana. Kamko ka×na  (mission) tarisamsoani jang·kirangko donanikon nisan (goal) ine agana. Nisan-an kamko ka·na (mission) man·atna aro nikjagringani(vision)-ko chu·sokatna daksamsoaniko dakgipa ong·a.

@ Dilgipao nikjagringani dongoba kam ka·ani dongjaode tong·sao bon·chongdikaigen. Kam ka·ani dongosa nisan-ona sokna man·gen

 

5.  Gisikchi Gapani (Spirit Filled)

Gisik Rongtalgipachi gapako man·e kamko ka·anio Isolni skani gita chu·sokna ama. A·gilsakni gisik a·ning bitanide dilgipani kamko dakchaknasan man·a indiba chu·sokatnade man·ja.  Isolni Gisik Rongtalgipani gapanichi kam ka·gipasa chu·sokgipa ong·na man·a (Johan 14:16, 26; 15:26; 16:13). Mandeni ma·siani aro changa sapani chon·diksasan ong·aia, Isolni Gisikni dilaniko pilak somaion nanga.

@ Gisiko re·rurabo, unon be·en-ni skarangchi amako man·jawa.

 

 

6.  Dakna Amani (Competent)

Pilak kamrango namgipa chanchisoanirang baksa kam ka·achi (dakna ama ingipa gisik donganichi) je kamoba chu·sokna ama. Neng·nikanirang sokbatelaigen ine ma·sian baksa kamko chu·sokatna amaigen ine gisiko ka·dongani donggipaan "Competent leader-ko miksonga. . Ia indakgipa gisik pangnan namako nikna man·ata aro bilakatako man·ronga.

@ Isol baksa mamungkoba dakna amgijani dongja. Pilakon dakna amani donga. Iandakgipa gisik Isolo ka·donge pilak kamko ka·na amata.

 

7.   An·tangko Rakkiani (Self-Disciplined)

Dilgipa ong·anio chu·sokgipa ong·na an·tangni gisik aro bewalrangko rakkina nanganirang donga. An·tangko rakkina amode kimkime jotton ka·na bil gnanggipa ong·a.

@ Mandeni be·ende skatang dakna skaia aro aratbea. Indiba an·tangko sason-o donna amode, pilak namgijanirangoni jokgen.

@ Ranta ka·jringachi an·tangko namatna ama; aro unbaksa Isolni dilachi nambate dakna man·a.

 

8.  Nokkol Ong·ani (Servanthood)

Dilgiparang nokkol dangdike on·gipa ong·a. Nokkol dangdike on·gipa ong·aniko Gitel Jisu Kristoan dakmesokaha. Gitel Jisuan nambatsranggipa dilgipaba ong·oba, Ua an·tangko dilgipa ine aganako namnikja. Ua dangdike on·nasa re·baa ine agana. Dilgipade nokkol gita dangdike on·gipasa ong·na nanga.

@ Nokkol gita dangdike on·bo, unon na·a bang·a manderangko Jisu Kristoona rimbana man·skagen.

 

9.  Bil Gnangani (Authoratative)

Isolni Gisikchi bil ganataniko man·e kam ka·o chu·sokgipa ong·na ama. Ia indakgipa dilgipa an·tangko Isolni donako man·e kamko ka·enga ine ma·sia. Indiba bilko jakkalna ong·ja, Isolni bilo aro Uni kattao ka·donge kam ka·anisa ong·a.

@Bilko jakkalna mikboknabe, indiba sakgipinrangna ka·saskabo.

 

10.     Rakkitimgipa Ong·ani (Stewardship)

Bebera·gipa sakantian Isolni gamni nitimgipa ong·a (A·bachenga 1:28). Jie kamko ka·china donako man·a, ua kamko namedake nirok simsake ka·na nanggipa ong·a. Minganti kamkon Isolni see rakiani dongani gimin aro Isolnasa kamko ka·engani gimin name nitimani kamko ka·na nanga.

@ Namgipa nitimaniko dakgipa dilgiparang manderangna gisikko on·e namedake kamko ka·a.

 

11.Dilgiparangko Bikotrikrikani (Reproducing)

Sakgipin dilgiparangko bikotrikrikatgipasa dilgipa ong·anio chu·sokgipa ong·a. Saksa dilgipa sakgipin dilgipako bikota aro ua sakgipin dilgipaba sakgipin dilgipako bikotskaa; indake bikotrikrikgipa ong·a. Bikotrikrikani kamko ka·na dikdiksa somaio man·ja indiba adita bilsirangko nanga. Dilgipaan ja·rikenggiparang baksa damsan janggi tangrimesa  ja·rikenggiparangoniko ka·sine dilgiparangko bikotrikrikna man·a.

@ Dilgiparangko kamo donna seokanide Isolni kamsa, indiba uamangko tarianio dile me·sokanide nang·ni kam ong·a.

 

12. Mondoli Gimikni Dilani (Whole church Leadership)

Mondoli gimikni kam ka·ani ine aganon, bebera·gipa sakantina Gisik Rongtalgipani ka·sae on·gimin guntangtangko u·ie kam ka·ani ong·a (1 Korinthirangna 12:1-31; Romrangna 12:4-8; I Korinthirangna 7:7; Ephesus. 4:11-13). Pilakande apsan kamko ka·jawa maina saksa bebera·gipana gimik gunrangko on·gopja, indiba badia gunko nambate (I Korinthirangna 12:31; 2 Timothyna 1:6) on·aha uko u·ie kamko ka·na man·a. Ia Gisikni ka·sae on·anirangko jakkalachi Kristoni mondoliko mangrakatna ama (I Korinthirangna 14:5).

Ia Gisik Rongtalgipani ka·sae on·gipa gunrango pangchakan baksa kamrangko sualgrike kam ka·anichi Mondoli gimikna bak ra·na chol  ong·a. Bebera·gipa sakantian Isolni kamalrang ong·e dangdike on·china jokatako man·aha. Kam ka·giparangko bang·e nanga ine Jisu Kristo agana (Luk 10:2). Iano full time ka·giparangko miksongja; bebera·gipa pilakni kam ka·aniko miksonga. Bebera·gipa sakantinan kamni kri boksisko on·na agansoani (1 Korinthirangna 3:11-15; 2 Korinthirangna 10:5) gitan sakantian man·gen; kam ka·aniba sakantini dai ong·a.

Ø  Sakantian kam ka·ode, bang·bata manderangko Jisu Kristoona rimbana man·gen aro pilak jatonan Nama Kattako sokatna ta·rake man·gen.

Ø  Namgipa dilgiparangko bikotna, theological trainingko ra·na manderangko watatna aro bang·a missionaryrangko watatna man·gen.

@  Sakantian kamtangtang gita bichal ka·akoba man·gen. Uni gimin dilgipani kamko ka·aniara sakantini dai ong·a.

Bon·kame Didiani

Mingsa dakbewalko ja·rikaiachide dilgipa ong·anio chu·sokgipa ong·bana man·ja, dingtang dingtang Isolni on·gimin gun aro changa sapanirangko ra·chimonge ranta ka·achisa chu·sokgipa ong·baa. Ia chu·sokaniko ra·baaniba saksa dilgipachi ong·ja, bang·a dilgiparang aro bakko ra·giparang baksasa kam ka·rimachisa ong·a.

An·ching bebera·gipa sakantian jotton ka·ani dongchongmotna nanga, jotton ka·ani gri mamungoba chu·sokani dong·ja. Jotton ka·gipanasa Isolba dakchaka. Unigimin na·a dilgipa ong·e Gitel Jisuna ka·saae dangdike on·enggipa ong·ode, nambate aro ta·rakbate dangdike on·na mangsonganiko donbo. Ia kosako chanchibagimin cholrangoniko gimikko man·jaoba, badiabakode an·tangna basee ra·e ja·rike jotton ka·e nibo. Ia chasong changgipa sapgipa dilgiparangko nangnika. Jajrengnabe, an·tangko Isolna pakwatbo. Isol nang·ko dilgipa ong·anio chu·sokgipa ong·na dilgen.·

About Author

Sengban M Momin is an author who formerly worked as a pastor in two churches for 10 years. He has a passion for God’s mission and love to share the Word of God. He has authored few books in his own language (Garo) including his best book Isolni Ka·saae Jokataniko Bebera·e Janggi Tangani (Living by Faith in God’s Gift of Salvation). He presently lives with his wife and a daughter in Tura, Meghalaya, India.