Contents
Aganchengani
Talatchengani
Chapter 1: Kristian-ni Agangrikaniara maia?
Chapter 2: Mass Communication Aro Mass Media-ni Dingtanggrikani
Chapter 3: Kristianrangni Mass Media-ko Jakkalbaani
Chapter 4: Kristianrangni Mass Media-ko Jakkalani Miksongani
Chapter 5: Mass Media-ni Rokomrang Aro Uarangko Kristianrangni Jakkalani
Chapter 6: A•paloni Ra•bianirang Aro Kristianrangna Aganchakanirang
Aganchotani
Bibliography
Aganchengani
Da•alni chasong Advance Scientific Technology aro Information-ni chasong ong•a. Ia chasongo pilak kamrangko ta•rakbate, apalbate aro ning•tubate ka•na cholrang donga. Bilakbate ka•enggipara Mass Media-an ong•a; jechin Mass Communication-ko dakna chol ong•a. Ian bang•a manderangna bang•gija somaio aganatani ba agangrikani ong•a. Ia Mass Media-ra bil gnanggipa ong•a; iachi a•gilsakni bang•a manderangko salgopna man•enga. Je biapona Mass Media sokanga, bang•a manderangan uko jakkalna draatako man•tela. A•gilsakni diltubatgipa songrangona agre ia Mass Media sokangtokmanaha.
Gitcham agangrikani cholrangko jakkalachi ia Mass Media (mongsongbate Print aro Electronic Media)-ko jakkalenggipa manderangona Jisu Kristoni jokatani Nama Kattako sokatna altuagipa ong•jaengaha. Manderang je rokomni Mass Media-ko jakkale namen jakchakjaenga; Kristianrang uamangni jakkalgipako jakkalpae Nama Kattako uamangona sokatna cholko ra•skana nangenga.
Talatchengani
Ia article-o Mass Media-ko rongtale sena miksongja. Ia Mass Media-ko jakkalachi Nama Kattako gipatna nambegipa chol ong•a ine gisik nangataniko on•taipilnasa sea.
Ia kitapo Mass Media-ko Kristianrangni jakkalbaani, uko jakkalani namgnirang aro Mass Media-ni rokomrangni gimin sea. Mass Media-ni rokomrangara, jedake Folk (Traditional) Media, Print Media aro Electronic Media-rang ong•a. Da•alni ta•rakbatgipa Media-ara Electronic Media ong•a. Saobarang Electronic Media-ko jakkalkujaoba, Electronic Media-ara maia ukode u•itokengaha. Ia janapgimin Mass Media-ni rokomrango Nama Kattako gipatna bang•a cholrang donga.
Ia article-ko poraiachi poraigipa sakanti gisik nangataniko man•gen ine ka•donga.
Chapter 1: Kristian-ni Agangrikaniara maia?
Agangrikani (communication)-ara biap saoni biap gipinona gisikni nikani, chanchiani, gisik nangbeani, gamchatani aro bebera•ani aro dakbewalrangko on•atani ba sokatani ong•a. Iako ma•siatani ine seng•sote aganna man•gen.
Kristian Agangrikani (Christian communication)-ara Kristianni gisikni nikani, chanchiani, gisik nangbeani, gamchatani aro bebera•ani aro dakbewalrangko agangrikani ong•a. Iano u•iatani ba ma•siatani mangmang ong•aija, Jisu Kristoni Nama Katta dongchapa. Nama Kattako agangrikachi Kristoni bebe aro kakket ong•anio, pilak mandena ka•saae Uni songnokko rikani ong•a.
Niam Gital Sastroo Jisu Kristo agangrikachi (cf. Mark 1:38; Luk 4:18-19, 43-44) Pagipa Isolni skaniko manderangna ma•siataha aro bang•a manderangko jokaona rimbaaha. Kristian sakantian Jisu Kristoni jokatani Nama Kattako man•enba uko gipinrang baksa agangrikskana (cf. Johan 1:44-46; 4:28-38; Watatarang 4:20; 8:4; 11:19-20; Romrangna 1:13-15; 16; I Korinthirangna 4:15) draatako man•a. Iako kan•dike aganode, Jisu Kristoni gimin jeko u•iaha sakgipinrangna aganskani ong•a.
Chapter 2: Mass Communication Aro Mass Media-ni Dingtanggrikani
Mass Communication
Mass Communication-ara bang•a manderangna agangrikani ong•a. Iani gimin ka•mao talata.
1. Ian jinmana agangrikatani ong•a. Iano sanaba ma•eke agangrikani dongja.
2. Ian ta•rakgipa agangrikatani ong•a. Iano bang•a knasogipa ba niksogiparangna dikdiksa somaio agangrikatna man•a.
3. Ian dikdiksanasan dongaigipa agangrikani ong•a. Iano knasogipa ba niksogiparang kattako ta•rake ra•rikna nanggipa ong•a.
4. Ian nangrime rikgipa ong•a. Ia nangrime rikgimin agangrikanio adita manderangko nanga.
5. Ian rama samsa agangrikani ong•a. Iano kansogipa ba niksogiparang bakbak aganchakpilna chol dongja.
Mass Media
Mass Media-ara jinmana agangrikaniko dakani chol ba agangrikaniko ra•anggipa ba agangrikaniko dakani ostro ong•a. Ia donggijade Mass Communication-ko dakna man•ja. Ia Mass Media gita mandeni gisikni nikani, chanchiani, gisik nangbeani, gamchatani aro bebera•ani aro dakbewalrangko sakgipinrangona watatna man•a, aro uko bang•a rokomni manderang ra•chaksona man•a. Kan•dike aganode, Mass Media-ra Mass Communication-ko dakani chol ong•a.
Chapter 3: Kristianrangni Mass Mediako Jakkalbaani
Chasong gitchamni somaio (Kristoni atchina skang aro ja∙mano), Bibleo (Niam Gitcham aro Gital) me∙sokgimin gita, Isolni kattako gipatna Mass Media-ni gitcham rokomrangko jakkalaha.
Uamangni jakkalgipa Mass Media-ni rokomara Folk (Traditional) Media ong∙a, jekai: maniani, nichakram, git ring∙ani, dakmesokani, chrokani, noksa salani, ro∙ongrango ba nokni pakmarango seani, bimang tariani aro gisik ra∙na tarigiminrang ong∙a.
Uamang sechakna ro∙ongrangko kite, bolrangko konge ba sol∙e, mat-bigil aro bol-bigilrangko tariaha (A∙chik-rangba skangode mat-bigil, bol-bigil, bol bijak aro re∙salrang-koba sechakna jakkalbaha ine agana). Iarang Print Media ong∙jaoba, Printing Press-ko man∙kujao Print Media-ni pal jakkalgiparang ong∙a. Segimin kattarangko manderangona sokatna uamang ja∙achi re∙e, ut aro gure-rango gae, ta∙rakbate sokatna man∙gipa rot gari aro jahatrang-ko jakkalaha (Papyrus-ara skangni Egypt a∙songo chio chagipa bolni ga∙tongoniko tarigipa sechakani ong∙a. Iako Niam Gitchamni somaio jakkalbataha. Parchment-ara mat-burungni bigiloniko tarigipa sechakani ong∙a. 2 Timothyna 4:13-o agangipa “kitaprang” ingipara papyrus aro “segimin bigilrang” ingipara parchment ong∙a ine agana.)
Ua chasongo jakkalgiparang da∙oni Electronic Media gita jinmana mikjapsanon sokatna man•gipa ong•jaoba, uamangni somaio je cholrang donga uarangko jakkale Nama Kattako ta•rake sokatna kam ka•aha.
15-gipa ritcha bilsirango Renaissance aro Reformation-ni somairangoni Print Media-ni rokomrang, jekai: sea jotani ostrorang, lekka aro pen-rangko jakkale Nama Kattako see Printing Press-o chapa ka•e bang•a manderangna sokatna man•aha. Uamang Nama Kattako gipin biaprangona sokatna jahatrangko jakkalaha.
Da•alni salrangode Electronic Media-ni rokomrang, jekai: computer, mobile aro gipin sechakanirango see, segimin kattarangko cd, pendrive (data traveller) aro dingtang dingtang chips-rango ra•angskae ta•rakbate aro bangbate sokatna man•enga.
Batanggimin chasongni somaio Nama Kattako segiminrangko manderangona sokatna gari, jahat, rail aro aeroplane-rangko jakkalachim indiba da•ode ta•rakbate sokatna man•gipa internet, website, tele-communication (mobile phone)-rangko jakkalskaenga.
Skang chasongna bate Nama Kattako ta•rakbate gipatna da•alni chasongo cholko man•enga. Kristianrangoni Mass Media-ni gamchataniko u•igiparangde ia cholko gimaatgija gisiko nange jakkaltokenga.
Chapter 4: Kristianrangni Mass Mediako Jakalani Miksongani
Ia a•gilsako je agangrikani cholrang donga, uarangko Isolni mission-ni kamko ka•anioba mamung kenmangijan jakkalpana man•a. Chasong gitalni bang•bata Kristianrang Mass Media-ko jakkalenggipa manderang baksa agangrikna Mass Media-kon jakkalpaachisa chol ong•aia ine u•ia.
Kristianrangni Mass Media-ko jakkalani miksonganiara Jisu Kristoko bebera•aniko nisan done, Kristoni Nama Kattachi manderangni janggi tanganina dingtanganiko (rongtalani, kakket ong•ani, bebe ong•ani, ka•saani, tom•tomaniko) ra•bana miksongani ong•a. Uni gimin je dakgipa Mass Media-ko jakkalgenoba Kristoni Nama Kattao pangchake dakna Kristianrangni kam ong•a. Kristoni Nama Kattani ka•saani bilo, tom•tomani, nangrimani aro gisikni bilakaniko ra•bae namgijani, ka•saninggijani, nangrimgijani aro tom•tomgijanirangko gimaatskana amani bil donga.
Kristianrangna tik gimin kamara, Isolni dakgimin pilak jatrangna Nama Kattako aganprakani ong•a (cf. Mati 28:19-20). Ia a•gilsako janggi tangenga dipete, je cholrang donga uarangko jakkale Nama Kattako gipatna tikkelna nanga. Tikkelani dongjaode ia a•gilsak andalani bilchi ganggope gimanasienggipako, Isolni nikjagringa gita, saleke jokatna man•rikjanaba donga.
Chapter 5: Mass Mediani Rokomrang Aro Uarangko Kristianrangni Jakkalani
Skangni chasongrango (B. C. Before Christ) jakkalgipa Mass Media-ara Folk Mediani rokomrangsa ong•bata. 15-gipa ritcha bilsirango Renaissance aro Reformation-ni somaionisa Mass Mediani rokomrangko gital gital bikotrikrikbae jakkalbaha.
Da•alode Mass Media-ni rokomrang namen bangbeaha. Uarangoniko rokom gittam dake sualna man•a. Uaranga: 1. Folk Media, 2. Print Media, aro 3. Electronic Media ong•a. Uarangko kan•dike talatenga.
1. Folk (Traditional) Media
Folk (traditional) Media-ra manderangni dakbarikrikgipa agangrikani (kattako gipatani) chol ong•a. Print aro Electronic Media-ko man•kujaonin Folk Media-ko a•gilsakni pilak biapon aro pilak jatan jakkalbaha. Sastrooba Isolni kattako manderangna aganna Folk Media-ko jakkalaniko me•soka. Folk Media-ni rokomrangko ka•mao me•sokatenga.
i) Maniani (festival): Maniani-ara jatni ba toromni dingtangmancha gisik ra•aniko dakani ong•a. Manianirang batanggimin somaio ong•anggiminko gisik ra•ate manderangna ding•chaoaniko on•na man•a.
ii) Dakmesokani (theatre): Dakmesokram biapo jatni ba toromni golpo ba skianirangko dakmesokani mande jinmako an•saoatna aro gisikko nangatna ama.
iii) Dakmesokani (drama): Dakmesokani chong•mot ong•aniko gisiko dongkamatna ama. Golporangko ba ong•enggipa obostarangko dakmesokachi manderangko kusi ong•e skie ra•na dakchaka.
iv) Git ring•ani (song): Git ring•ani manderangni gisik ka•tongko ka•srokata aro namgipa chanchianirangko naata.
v) Chrokani (dance): Chrokani manderangko gisikko nangatna ama. Git ring•a baksa chrokachi kattani ortorangko u•iningata.
vi) Noksa salani (art & painting): Noksa salani manderangni gisikko u•iningata aro gisik ra•aniko bakroata.
vii) Gipinrang, jekai: golpo aganani (eg. fairy tale), ballad (chrokna ring•ani poedo), songni gronggrikani ba tom•rimani (eg. wal•tim chakani, bajar anti re•ani), craft (wata chengani), mela, symbolism, etc. Iarang gimikan manderangko gisik nangatna amgipa Folk Mediani rokomrang ong•a.
Folk Media manderangko gisik nangatbegipa ong•a. Sastroo Folk Media-ni rokomrangoniko bang•batakon jakkalaha; jekai: maniani, git ring•ani, chrokani, golpo aganani, tom•rimani, ect. Uamangni somaio je agangrikani cholrang donga, uarangko jakkale Nama Kattako gipataha. Print aro Electronic Media manderangona sokbahaoba, Folk Media-na gisik nanggipa biaprango, Folk Media-koba jakkale Nama Kattako gipatnaba nambegipa chol ong•engkua.
2. Print Media
Printing-ko (chapa ka•ani) 15-gipa ritcha bilsirangni bijangchi jolo Europe a•songo bikotchengaha. Reform ka•giparangba ia Print Media (chapa ka•ani)-ko Nama Kattako gipatna jakkalaha. Uamangni nakatatchenggipa kitapara Latin Bible ong•a. Ja•mano uamang Tyndale’s New Testament-ko nakatataha. Ua somaioni da•alona kingking Kristian dangdike on•gipa dolrang aro mondolirang Nama Kattako segiminrangko chapa ka•e a•gilsakni dingtang dingtang biaprangona watpriprae gipatbaenga.
Print Media-ni namgnirang: i) Bang•gija manderangan bang•a biapni manderangna chapa ka•giminrangko altuae sokatna chol donga. ii) Poraisogiparangba sakprakan poraie kattarangko ma•sie ra•chakna man•a.
Print Media-ni rokomrangko me•sokatenga:
i) Book: Book (kitap)-ara adita jak-rangko jakkale see chapa ka•gipa ong•a. Ia kitapo maiba subject-ni gimin chu•onga gita talate sena man•a. Talate segimin kitaprang manderangna ning•tubate aro srangbate ma•sianiko on•a.
ii) Booklet: Booklet-ara ba•rengreng dake chongipa kitap ong•a. Iano maiba subject-ni gimin kan•dike sena man•a.
iii) Brochure: Brochure-ara ba•rengreng dakgipa kitap ong•a. Iano maiba subject-ni gimin kan•dike sena man•a.
iv) Pamphlet: Pamphlet-ara namen ba•rengreng dakgipa kitap ong•a. Iano maiba subject-ni gimin kan•dike sena man•a.
v) Leaflet: Leaflet-ara ba•rengreng dake tem•na man•gipa lekka ba kitap ong•a. Iano maiba subject-ni gimin kan•dike sena man•a.
vi) Magazine: Magazine-ara ba•rengreng dake dal•kalgipa kitap ong•a. Iano dingtang dingtang subjectni gimin kan•dike segiminrangko ra•chimonge sena man•a. Iako jaanti, jagniprako, jabriprako, jadokprako aro bilsiprako nakatatna man•a.
vii) Newsletter: Newsletter-ara ba•rengreng dakgipa lekkani grango chitti see chapa ka•gipa ong•a. Iano u•iatani ba didiani kattarangko sena man•a. Iako jaanti, jagniprako, jabriprako, jadokprako aro bilsiprako nakatatna man•a.
viii) Newspaper: Newspaper-ara jak gni ba jak bri dake dal•gipa lekkani grango see chapa ka•gipa ong•a. Iano Kristianni aro mondolirangni kam ka•ani obostarangko see u•iatna man•a. Iako salanti, antiprako, jaanti, jagniprako, jabriprako, jadokprako aro bilsiprako nakatatna man•a.
(ix) Tract: Tract-ara gipinrangna bate chongipa aro ba•rengreng dakgipa lekkani bimango see chapa ka•gipa ong•a. Iano maiba subject-ni gimin noksarang baksa kattarangko ba kan•dikgipa golporangko sena man•a.
x) Comic book: Comic book-ara chongipa ba magazine-ni bimango see chapa ka•gipa ong•a. Iano golporang ba toe agananirangko noksa gnang talate sena man•a. Ia indakgipa seanirang poraigiparangko gisik nangata.
Me•sokbagimin Print Media-ni rokomrangko jakkalachi Nama Kattako dingtang dingtang manderangona sokatna nambegipa chol ong•a. Dingtang dingtang Print Media-ni bimango segimin Nama Kattarangko poraiachi manderang an•tangtangan Jisu Kristoko bebera•na cholba ong•a.
India-o Print Media-ko jakkale Nama Kattako gipatenggipa Kristian dangdike on•gipa dolrangara: ISPCK, OM Books, Bible Society of India, Asia Trading Corporation, Evangelical Literature Service, Gospel Literature Service, Scripture Gift Mission, CISRS Publication Trust, Rhema Media Centre, Grace To India, CEEFI, India Bible Literature, Tura Book Room, aro gipinrang.
Pilak songrangni skia poraia man•gimin manderangna ia Print Media-ko jakkale Nama Kattako gipatna altuagipa ong•a. Uamangona Nama Kattako sokatahaode, uamangchin skia poraia man•kugijagiparangnaba Nama Kattako sokkatrikrikatna man•a.
Kristian bebera•gipa sakanti, dangdike on•gipa dolanti aro mondolirang ia Print Media-ko Nama Kattako knakugijagipa manderangna Nama Kattako gipatani chol ine ra•e ta•rakbate kam ka•na nangenga.
3. Electronic Media
Aganbagimin gita, ia Advance Scientific Technology aro Information-ni chasongo Print Media aro Electronic Media manderangko gisik nangatbatenga. Iarangnan manderangba somaiko on•batenga.
Da•ororoni somaio Print Media-na bateba ta•rakbate sea jotani ba agangrikaniko saksa sakgipin ba a•songsa a•songgipinni manderangona sokatna man•gipade Electronic Media-an ong•a. Jechin dingtang dingtang biapni manderangna dikdiksa somaio agangrikna chol ong•a. Kristianrangnade ian Nama Kattako gipatna nambatgipa chol ong•skaa.
Ia Electronic Media-ko rokom gni dake sualna man•a. Skanggipa, Un-interactive Electronic Media, jean agangrikna man•ja. Gnigipa, Interactive Electronic Media, jean agangrikna man•a. Ka•mao iarangni gimin talataniko kan•dike on•a.
Skanggipa: Un-Interactive Electronic Media
Ian agangrikna man•gijagipa Media ong•a. Chong•motan ia Media-o jeko knaata ba me•sokata ukosan knasona ba niksona man•aia. Iano knasogipa ba niksogiparangna agangrikna bang•gija cholrangkosan on•aia.
Ia Un-interactive Electronic Media-o rokomgni donga. Uarang Broadcast Media aro Non Broadcast Media ong•a. Ka•mao uarangko kan•dike talata.
i) Radio: Radio-ara Broadcast Media ong•a. Ian ku•rangchi ba gam•atachimangmang kattarangko knaatani ba u•iatani ong•a. Iano bang•a rokomo aganatani aro git ring•anirangko manderangna knatimchina watate on•na man•a.
1923 bilsio Mr. A Cook, Iceland-ni missionary, Nama Kattako gipatna Radio-ko jakkalchengaha. Uni ja•mano bang•a Kristian dangdike on•gipa dolrang aro mondolirang Radio-ko Nama Kattako gipatna namgipa chol (Nama Kattako aganachi aro git ring•anichi bang•a manderangna somaisao sokatna man•gipa ong•a) ine jakkalbaenga.
Mongsonggipa Kristian Radio stationrangara: Far East Broadcasting, Trans World Radio, HCJB World Radio, Vatican Radio, Feba Radio, Athmya Yatra Radio (India), etc. Iarangna agreba bang•a local aro national channelrango Nama Kattani programrangko ra•chape ba sikjote watatenga.
ii) Television: Television-ara Broadcast Media ong•a. Ian nika niani baksa kattako watate u•ianiko on•na man•gipa ong•a. Ia Televisionko a•gilsak gimikon ta•raken ra•chakna man•a. ‘Chasong gitalni agangrikani cholrangoni ian bil amgopbatgipa ong•a’ ine Binto Kiluckan agana. Television-o me•sokatani namgnirangara:
a) Ia somaisao bang•a manderangna sokatna man•a.
b) Ian sepangbate aro srangbate u•ianiko on•a.
Kristian Television channelrangko bikote golpo aganani, dakmesokani, toe aganani, git ring•ani, Sastroni skiani, Sastroni golporang aro gipin dingtang dingtang programrangko me•sokatna man•a.
iii) Video aro Audio Cd: Audio aro Video Cd-rangara Non Broadcast Media ong•a. Iarang manderangna gisikni ding•chaoani aro gisiko nangatbeaniko on•a. Iano skia poraiani aro agan-talatani programrangko dakna chol ong•a. Bang•a Kristian dangdike on•gipa dolrang aro mondolirangan audio aro video ministryrangko jakkalengaha.
iv) Music Audio aro Video Cd: Music Audio aro Video CD-rangara Non Broadcast Media ong•a. Namgipa doka dam•anirang aro git ring•anirang manderangni janggi tanga-niko namaona dingtangatna man•a. Manderang knatimani aro nikanina gisik on•bata. Nama Kattani gitrangko noksa gnang (video) ba noksa gri (audio) CD-rango chipe gipatna man•a.
v) Film: Film-ara (ba cinema) Non Broadcast Media ong•a. Film manderangko gisik nangatbegipa ong•a. Iano somai sao bang•a manderangna apalbate gipatna man•a. Niksogiparangba katta aro kamrangko ta•rake ja•rikpana man•a. Iano Kristianni skiani aro gisikni parape•anirangko gipatna nambegipa chol donga.
Gnigipa: Interactive Electronic Media
Ian agangrikna man•gipa Media ong•a. Chong•motan aganatgipa ba me•sokatgipa baksa knasogipa ba niksogiparang altuaen sea jotachi ba ku•rangchi agangrikna man•a.
i) Internet aro website: Pilak sea jotanirangko computer aro mobile phonerang gita see ta•rakbatsrange dikdiksa somaio a•songsa a•songgipinona watgrike agangrikna man•a.
Ia internetko computer aro mobile phonerango kulie jakkalna man•a. Internet-o e-mail (electronic mail) addressko kulie sea jotanirangko ta•rake watgrikna man•a. Website-ara segimin kattarangko publish ka•e donna man•gipa ong•a. Iano publish ka•giminrangko je somaioba nina altuaen man•a. Ru•uta bilsirangna skangonin Kristian dangdike on•giparangni internet aro website-o publish ka•gimin Nama Kattarang bang•en dongengaha.
ii) Mobile aro Telecommunication: Iano ku•rang aro sea jotachi agangrikna man•a. Da•ororoni Kristianrang mobile aro telephonerangko jakkale Nama Kattako gipatna aro bebera•giparangko dakchakna cholko ra•tokenga. Ia cholrangara, jekai: electronic mail, paging, fax, cellular telephony, video conferencing, audio & video text services, data service, etc.
iii) E-commerce aro E-banking: Electronic commerce production, advertising, palani aro sualaniko telecommunication networkrangchi dakna man•a. Internet gita computer hardware, software, kitaprang, music compact disc-rangko palani aro breaniko dakna man•a. Kitaprangkoba online palna aro brena man·a. Ian Kristian dangdike on•giparangni bikotgimin bosturangko manderangona sokatna namgipa chol ong•a.
iv) Electronic church: Electronic churchni gita (internet aro website gita watatgipa) Isolko olakkiani programrangko watatna man•a. Je mandeba (ja•kora ba re•na man•gijagipa ba sagipa) noktango ba hospitalo donge Isolko olakianio internet aro website gita bak ra•na man•a.
v) Social Media: Ia chasongni manderang Social Media-ko ma·sigijagipade bang·jawaha; bang·batan ma·simanaha. Ia Social Media-o bang·a rokomni cholrang dongaha; uarangoniko manderangni jakkalbatgiparangko iano me·sokatenga:
1. Facebook
2. YouTube
3. WhatsApp
4. Facebook Messenger
5. Instagram
6. Twitter
7. Reddit
8. LinkedIn
9. SnapChat
10. Pinterest
11. Discord
Kristian dangdike on•giparang ia a•gilsako pilak jatni manderang baksa bakrimaniko bariatna information technologyrangko jakkalengaha. Bang•bata mainline aro chonchongipa mondolirangmangba an•tangtango e-mail address (internet) aro website-rang dongaha. Ia Electronic Media namen mongsonggipa ong•e chasong gitalni agangrikanio kam ka•enga.
Chapter 6 : A•paloni Ra•bianirang Aro Kristianrangni Aganchakanirang
Kristianrangnade Mass Media-o (mongsongbate Print aro Electronic Media) rokom rikkit ra•bianirang donga. Jedake satellite, cable TV, internet, website, entertainment industry-rang Kristianrangna ra•biani aro kenataniko ra•bachongmota. Iarang man•rikrikbaenggipa (traditional) gamchatanirangko bon•roroatange kusiari aro gamsengrangko gamchatbate ra•baskaniko on•a. Songsar-o bakrime janggi tanganiko (jean A•chik jatni gamchatgipa dakbewal aro Bible-ni dakbewalba ong•achim) gimaatroroe ma•eke ba saksan janggi tanganiko (individualistic lifestyle) ra•bana ama. Iani gimin Print aro Electronic Media-na Kristianrang namen simsakbena nanga.
Ia a•gilsakni manderang (Jisu Kristoko bebera•gijagiparang) an•tangtangni namgnina Mass Media-ko jakkalbata. Uamangchi Mass Media-o Kristianrangna kenatani aro ra•bianirangko ra•baa. Uni giminan Kristianrangoni saobarangde ia Mass Media-ko namja ine jakkalna sikja. Oe, ia Mass Media-o bang•a namgijanirang aro kenatanirang donga; indiba ia kenatanirangna kenjagoke Mass Media-ko jakkalgija dongskaioba, ia chasongo Mass Media-chi salgopako man•e janggi tangenggipa Jisu Kristoko bebera•kugijagipa manderangde bang•batan gimaangskagen aro Mass Media-ni kenatanirang bang•rikrikbaskagenchim.
Da•alo Kristianrang Mass Media-ni gamchataniko u•ienba iachi Nama Kattani ka•saani, tom•tomani, rongtalani, kakket ong•ani, nangrimani-chi gapatskana namgipa chol ong•skaa ine ra•enga. Nama Kattako gipanio songsar, cholon-bewal, skia poraia aro sorkarini gamchatanirangkoba namrikrikatna chol donga.
Ia Mass Media-o Nama Kattarang gapchipaia ong•ode ua namgipa ong•chongmotgen; indiba iako namaona ra•bana saoba saksanchi ong•na man•jawa; Kristian sakantian ia Mass Media-ko jakkale Nama Kattako gipatna namgipa chol ine ra•e jakkalna nanggen.
Aganchotani
Ia Mass Media-ni gamchataniko u•iasan ong•ja, iako Isol an•tangni dedrang (Kristian) sakantina Nama Kattako gipatchina patiaha ineba ra•na man•a. Kristian sakantian iako jakkale ia a•gilsako Isolni bangki kamrangko ta•rakbate, bilakbate aro ka•donge ka•angna man•gen.
Kristian sakantian ia cholko gimaatgija jakkala ong•ode, Jisu Kristoko bebera•kugijagiparangko Jisu Kristoni jokataniona rimbana aro bilgrigiparangko dakchakna ba bilakatna man•chongmotgen.
Hai...
Kristian sakantian Mass Mediako
jakkale Nama Kattako gipatna
jotton ka•na!
