Gitel Jisu Bebera·gipako Maikai Simsake Rakkia Aro Gisik Rongtalgipa Bebera·gipako Maikai Bilakata?

Gitel Jisuni an·ching bebera·giparangko jokatemangmang donaija; Ua an·chingko pangnajolna an·tangni jako rakkikame dona ine Sastro-o bang·en sakkiko on·a. Uarangoniko bang·gijako seoke iano kan·dike talataniko on·e seaha. Basakoba an·ching bebera·giparang ong·e janggi tangengon, Gitel Jisuni an·chingko jokatgipa ong·e Uni an·chingko rakkiani bidingo bang·a jajaani aro chanchisokna amgijanirang sokbaon, ia ka·mao mesokgipa Sastroni kattarangko poraie chanchibewalchi an·ching bilakatako man·pilna amgen ine ka·dongani gnang anga ia article-ko seaha. Aro ia Isolni kattarangko poraion, Gitel Jisuni an·ching bebera·giparangna simsak-nirokaniko aiao inmanpile nikgen. 

Ia article-o Baptist Manual-ko janape seaniko bang·en nikgen, indake Baptist Manual-ko mesokatani miksonganide Baptist bebera·giparangko gisik ra·atnasa seaha, jedakode uamang poraidapna skode uako poraina man·gen.

 

JISU BEBERA·GIPANA BI·CHAKENGA

 

1. Bebera·gipana Jisuan Pagipa Isolni Jakrao Donge Bi·chakenga

“uan Isolni jakrao donga, aro ua an·chingna mol·molchaka” (Romrangna 8:34^b).

Jisu Kristo bebera·gipa sakantina Uni ia a·gilsako dongengmitingoba bi·chakrongaha (Johan 17:6-19; 20-26), aro da·o Pagipa Isolni jakrao dongeba bi·chakame dongenga ine Sastroo agana (Ibrirangna 7:25; 9:24; cf. Ibrirangna 2:17, 18; 4:14-16; 12:2; Kolosirangna 3:1). Uan bebera·gipani Ukil gita chacha ong·e (1 Johan 1:8-2:1), bebera·gipako Isolni mikkango rakkienga (2 Timothyna 1:12; 4:18), aro Ua an·tangni re·baona kingking an·chingko jokate rakkigen (Philippirangna 1:6; Titusna 1:2).

 

2.     Bebera·gipana Gisik Rongtalgipa Bi·chakenga

“Aro uandaken Gisikba an·chingni bil griko dakchaka; maina nanga gita maiko bi·na nanga, uko an·ching u·ija; indiba Gisik an·tangan aganna amgija skimachi an·chingna mol·molchaka; aro ka·tongrangko sandigipa Gisikni chanchia mai, uko u·ia, maina ua Isolni namnika gita rongtalgiparangna mol·molchaka” (Romrangna 8:26-27).

Gisik Rongtalgipa bebera·gipa sakantio dongkame sakantina pangnan bi·chakenga, aro bebera·gipani bi·on, Isolni namnika mai, uko u·ina Uan bebera·gipako dakchaka (F. W. Harding, Baptist Manual No. 58, jak 36). An·ching bebera·gipa sakanti Gitel Jisu Kristoni kamko ka·anio aro uni ge·etanirangko dakanio Gisik Rongtalgipani dilanichisa namrorona aro chu·sokrorona man·enga.

 

JISU BEBERA·GIPA BAKSA PANGNAN DONGKAMA

Bebera·gipani janggi tanganio saksan ong·ja; un baksa Gitel Jisu Kristo aro Gisik Rongtalgipaan pangnan dongkama, aro uni dal·roroanina bilakaniko on·a.

 

1.     Bebera·gipao  Jisu Kristo Pangnan Dongkama

Jisu Kristo bebera·giparangna aganaha, “sal chon·jaskal pangnan anga na·simang baksa donga” (Mati 28:20^b).

Gitel Jisu an·tangni jokatgimin manderangko mamung dakeba watgalja. Ua bebera·gipa sakantiko an·tangan rakkia (Johan 10:27-29). Gitel Jisu an·chingni chel·ao donge an·chingna simsaka indake ong·ja,Ua an·tangni Gisikchi bebera·gipao dongkama (Romrangna 8:9). Watata Paul indake agana, “angade tanggipa on·jaha, indiba Kristoan ango tangenga”(Galatiarangna 2:20). Gisik Rongtalgipa jedake bebera·gipao dongkama, uandake Gitel Jisu Kristoba bebera·gipao pangnan dongkama.

 

2.     Bebera·gipao Gisik Rongtalgipani Bil Dongkama

Bebera·gipako uni bebera·chengani somaioni Isol an·tangni ong·na Gisik Rongtalgipachi mohor su·aha (Ephesusrangna 1:13-14). Gisik Rongtalgipa bebera·gipao pangnan dongkama (1 Korinthirangna 2:16^b; 3:16; 6:19), aro uni gisikko ganggope uni gisikni nikanirangko niksengata aro Kristona kam ka·na bilakata (Johan 14:16; 26; 15:26; cf. F. W. Harding, Baptist Manual No. 53, jak 31 aro No. 57, jak 35-36).

 

i) Bebera·gipao Gisik Rongtalgipani  Gunrang  Donga

Gisik Rongtalgipa bebera·gipao dongkame, bebera·gipani janggi tanganio Gisik an·tangan kam ka·a. Uni gunrang, jedake, “…ka·sara, katchaa, tom·toma, chakchika, rinok rinok daka, nama, bebera·a, sontol daka, an·tangtangko bamata” (Galatiarangna 5:22-23). Iarang bebera·gipao donga, aro iachi uni jokataniko man·aniko srangate Kristona nitogipa cholon-o janggi tangna dakchaka (2 Korinthirangna 3:17, 18; 2 Timothyna 1:14; cf. F. W. Harding, Baptist Manual No. 56, jak 34).

 

ii)    Gisik Rongtalgipani Ka·sae On·aniko Bebera·gipa Man·a

Bebera·gipa sakpraknan gisikni ka·sae on·anirangko on·a (Romrangna 12:4-8; 1 Korinthirangna 12:4-11; Ephesusrangna 4:9-13; 1 Pitor 4:10, 11). Ia gisikni ka·sae on·aniara kam ba dangdike on·anini rokom ong·a. Iako Kristoni be·enko namdapatna aro pilakni namgnina on·a (I Korinthirangna 14:5). Sakantinan dingtangdingtang dake ka·sae on·anirangko on·a (Romrangna 12:4-8; I Korinthirangna 7:7), indiba sakprakan badiaba bako nambate on·aniko man·a (I Korinthirangna 12:11, 31). Ia gisikni ka·sae on·anirangko jakkale Kristona dangdike on·anio aro jokatani Nama Kattako gipatanio nambate ka·na ama (I Korinthirangna 14:12; 2 Timothyna 1:6). Ia Gisikni ka·sae on·gimin gunrangchiba Isolni Gisikni bebera·gipao dongkamaniko saki on·a.

 

iii)  Gisik Rongtalgipani Bebera·gipao Kam Ka·ani

Gisik Rongtalgipa bebera·gipani “ka·tongko rongtalata… cholonko namroroata… Isolni kamko ka·na tariata aro bilakata”( F. W. Harding, Baptist Manual No. 53, jak 31 aro No. 57, jak 35-36.). Gisik Rongtalgipani bebera·gipao kam ka·aniara bebera·gipani janggi tanga gimikan Gisik Rongtalgipani bebera·gipao dongkamaniko me·soka, aro Uan ka·donganiko on·e bebera·gipako dakchaka ineba sakiko on·a (Johan 14:16; 26; 15:26; Romrangna 8:26-27).

Minggipin Gisik Rongtalgipani Bebera·gipao Kam Ka·anirang: Gisik Rongtalgipa bebera·gipako dilenga (Johan 16:13), skienga (Johan 14:26), bi·chake dakchakenga (Romrang 8:26), ka·donganiko on·enga (Romrangna 15:13; Galatiarangna 5:5), pap, torom aro bichalko u·iatenga(Johan 16:8-11), mondoliko rongtalatenga(Romrangna 15:16; Ezekiel 37:28), mondoliko ka·dimeatenga (Watatarang 9:31; 2 Korinthirangna 1:3), mondoliko namatenga(Watatarang 9:31), aro gipinrang (Johan 16:14; 15:26; Watatarang 13:2; 16:6,7; Romrangna 8:27; 15:30; 1 Korinthirangna 2:10-11; 12:11;  cf. Ibrirangna 10:15; 1 Johan 5:9; Watatarang 13:2,4; 20:28; Baptist Manual No. 57-62)

Gitel Jisu Kristo aro Gisik Rongtalgipani bilchi bebera·gipani gisik aro be·en-ni cholon bewalrang rongtalatrikrikako man·e (Ephesusrangna 1:4; cf. F. W. Harding, Baptist Manual No. 53- 55, 60; 133-134), Kristoni gun ba bewal gita chacha ong·rikrikbana ama (Romrangna 8:29; 2 Korinthirangna 3:17, 18; 1 Johan 3:2; Baptist Manual No. 56) aro Gitel Jisu Kristoni kattarang aro kamrangko ka·anio bilakatako man·rorogen (Baptist ManualNo. 57; cf. 1 Korinthirangna 13:12; Philippirangna 3:21).

 

Bon·kame Aganani

An·ching Gitel Jisu an·ching bebera·giparangko jokaton, an·tang baksa jringjrot dongatnasa jokatahani gimin Ua an·tangni jokatgiminrangko an·tangan rakkia aro ia a·gilsako tangengkugiparangko maikai a·gilsako janggi tangna nanga aro Uni kamrangko ka·na nanga, Ua an·tangan an·ching bebera·giparango dongkame an·chingko skia, didia, aro bilakata.

Gitel Jisuni an·ching bebera·giparangko rakkiani aro simsakaniko ma·sion,  an·chingni Gitel Jisu-ko mitel mitchue aro Una rasongko on·e janggi tangna aro Una ka·saskae Uni kamrangko kusi ong·e ka·na draatako man·chongmota.

Ua an·chingna inditan ka·sae dakenga, da·alo an·ching Uko mitelpilskagijan dongna man·jawa. Una rasongko on·skagijan dongna man·jawa. Aro Uni ge·etgipa kamrangko ka·skagijan dongna man·jawa.

About the Author

Sengban M Momin is an author who formerly worked as a pastor in two churches for 10 years. He has a passion for God’s mission and love to share the Word of God. He has authored few books in his own language (Garo) including his best book Isolni Ka·saae Jokataniko Bebera·e Janggi Tangani (Living by Faith in God’s Gift of Salvation). He presently lives with his wife and a daughter in Tura, Meghalaya, India.

Bebera·gipako Isolni An·tangna A·kangani

 

Bebera·gipako Isolni chu·gimik ong·aha ine sakina minggni a·kanganiko Sastroo mesoka. Ia minggni sakirangara bebera·gipako Gisik Rongtalgipachi mohor su·ani aro Kristoni janggini kitapo seani ong·a. Ia Isolni bebera·gipako akangani bebera·gipani gisik ka·tongko kimkimata aro mamung jajrengani gri ong·ata. Ia Isolni kattarangchi sakiko man·asan ong·ja, Gisik Rongtalgipa jean bebera·gipao dongkama, Uan Isolni jokatgimin ong·aha ine gisikko ka·donganiko on·aba on·a.

Iano kan·dikesan talataniko on·e seaha, Sastroni bakrangko adita on·chapchape seaha, ia indake Sastroni bakrangko chu·onge mesokatanichi talbate ma·sina sikgiparangna dakchakani ong·chongmota ine anga bebera·a. Baptist Manual kitapkoba janapaniko changni chang iano nikgen, uan Baptist bebera·giparangna poraidapchina mesokani ong·a. Ia articleko poraigipa sakantina Isol patichina aro Gisik Rongtalgipa sakantiko kimkim ong·atchina.

 

1

Isolni Gisik Rongtalgipachi Bebera·gipako A·kangani aro Gisik Rongtalgipako On·kamani

Gisik Rongtalgipara sawa? F. W. Harding, Baptist Manual No. 50, jak 29-o agana, Uan “Saksanan Sakgittam ong·gipa Isolni gittamgipa Sak ong·a. Isol Pagipara, Isol pilakkon ong·atenggipa; Isol Degipara, Isol an·tangni ong·atgiminko jokatenggipa; Isol Gisik Rongtalgipara, Isol rongtalatna an·tangni ong·atgiminko dongkamatenga” (2 Korinthirangna 13:14). Gisik Rongtalgipara Isol aro Kristoni Gisikan ong·a (Watatarang 2:18; cf. Romrangna 8:9-11, 14; 1 Korinthirangna 2:16), aro Uko “bebeni Gisik” (Johan 14:16, 17) ineba agana.

Gisik Rongtalgipaan papirangko gisik pil·na gisik nangatgipa ong·a (Romrangna 2:4; Johan 16:8, 9; F. W. Harding, Baptist Manual No. 50, jak 30). Ua jokkugijagipako jokaona gisik nangatgipa ong·e, jokgiminko pangnajolna jokamanina kimkimaniko on·gipa ong·a (F. W. Harding, Baptist Manual No. 58, jak 36-37 aro No. 61, jak 38).

i)       Bebera·gipana Gisik Rongtalgipako on·na Ku·rachaka

Jisu Kristoan an·tango bebera·giprangna Gisik Rongtalgipako on·na ku·rachakaha. “Aro anga Pagipao bi·gen, unon na·simang baksa jringjrot dongchina Ua ka·dimeatgipa sakgipinko on·gen, Ua bebeni Gisik; … na·simang Uko u·ia maina Ua na·simang baksa dongkama aro na·simango donggen” (Johan 14:16-17; cf. p. 26; Watatarang 1:5, 8). 

Jisu Kristokoba Isol Gisik Rongtalgipa aro bilchi nongaha (Watatarang 10:38; Johan 6:27); uandake Gitel Jisu (Isaia 61:1-3) aro Pagipa Isol bebera·giparangna Gisik Rongtalgipako on·na (Johan 14:26; 15:26; 16:7) ku·rachakaha.

 

ii)    Bebera·gipa Sakantina Gisik Rongtalgipako On·enga

Watatarangni somaio Jisu Kristoni sninggiparang aro bebera·giparangko Gisik Rongtalgipachi rudapchengaha (Watatarang 2:4, 33). Uni ja·mano Jihudi bebera·giparangna on·rikrikangaha (Watatarang 2:38-39; 4:31; 8:17), aro gipin jatrangnaba on·aha (Watatarang 10:44-45). Watata Paul agana, “je Gisikko ua an·chingko Jokatgipa Jisu Kristochi an·chingni kosako bang·bee rudapaha” (Titusna 3:6; 5-7). Bebera·gipa sakantinan Isol an·tangni Gisikko on·aha (Ephesusrangna 1:13-14), da·ona kingking on·enga (Ibrirangna 9:14-15), aro mikkangchiba on·angkugen.

 

iii)  Gisik Rongtalgipako On·ani Ortoara Bebera·gipako Uachi Mohor Su·e Isolni An·tangna A·kangani Ong·a

Isol an·tangni Gisik Rongtalgipa aro bilchi Jisu Kristoko nongaha (Watatarang 10:38). Apsandake Uo bebera·gipa sakantiko Gisik Rongtalgipachi mohor su·a (Ephesusrangna 1:13-14; 4:30; 2 Korinthirangna 1:22). Ia Gisik Rongtalgipachi mohor su·ani ortoana bebera·gipako Isolni an·tangna a·kangani ong·a. Chong·motan, jokatani saloni (mikkangchinaba) ua bebera·gipa Isolnisa ong·aha inani orto ong·a. Satan uko mamung dakna man·jawaha. Iachi Isolni bebera·gipako jokataniara jokatchongmotaha ine mikkangchina kimkimaniko on·a (2 Korinthirangna 1:22; Baptist ManualNo. 59, jak 36-37).

F. W. Hardingni kitap, Baptist Manual No. 53-o agana, “Gisik Rongtalgipa gisik pil·gipako atchitaiate uko siaoni janggiona batangata.” “Bebera·gipani ka·tongo Gisik Rongtalgipa Isol baksa bebera·gipani nangrimani aro papko watani gimin aro bebera·gipako Pagipa ra·chakchongmotahani gimin u·iate ka·dongatsrange pilak kenchakanirangko chel·ata”( F. W. Harding, Baptist Manual No.53, jak  32).

Bebra·giparangko ia a·gilsako tangengmitingon mohor su·na nangchongmotgipa ong·a ine me·soka (Parape·a 7:3). Gisik ra·bo, bebera·gijagipade Gisik Rongtalgipako man·ja (Parape·a 9:4; Johan 14:17); maina bebera·gipanasa ua Gisikko on·na ku·rachakaha (Galatiarangna 3:14^b).

 

iv)   Bebera·gipana Gisik Rongtalgipako on·kamaha

“Anga Pagipao bi·gen, unon na·simang baksa jringjrot dongchina Ua ka·dimeatgipa sakgipinko on·gen, Uan bebeni Gisik; … na·simang Uko u·ia maina Ua na·simang baksa dongkama aro na·simango donggen” (Johan 14:16-17). Jisu Kristo an·tangni ku·rachaka gita Uni Gisik Rongtalgipako bebera·gipa sakantina on·aha, aro ia on·aniara jringjrotnan ong·kamaha(cf. Ephesusrangna 1:13-14; 4:30; 1 Korinthirangna 6:19; 3:16; 14:25; 1 Johan 3:24). Gisik Rongtalgipako on·kamaniara bebera·gipako jringjrotnan Isolni an·tang baksa ong·kamate rakikamaniko mesoka.

Isolni jokataniara jringjrotnan ong·aniko Gisik Rongtalgipako on·kamachi srangbatata (Ibrirangna 9:14-15), aro bebera·gipa an·tango Gisik Rongtalgipa dongkama ine u·ia (Johan 14:17).

 

2

Jokgimin Mandeko Kristoni Janggini Kitapo See Isolni A·kangani aro Salgini Songnoko Napaniko Srangatani

 

i)       Bebera·gipani Bimungko Kristoni Janggini Kitapo Sea

Philippirangna 4:3:“maina Klement aro gipin gipin angmung dakpagiparang, jerangni bimungrangko janggini kitapo sea gnang.” Bebera·giparangko Kristoni (Mes Bi·sa-ara Kristoan ong·a) janggini kitapo segate dona (Parape·a 13:8; 20:12, 15; 21:27^b; Ibrirangna 12:23). Janggini kitapo sea ingipako Luk 10:20-ode salgio ine agana. Isolan Kristoo bebera·giparangko Uni (Kristoni) jako rakkina on·aha (Kolosirangna 1:13; Johan 10:27-29; 17:9, 12, 24).

 

ii)    Bebera·gipani Bimungko Basakoni Kristoni Janggini Kitapo Sea?

Kristoni janggini kitapo bebera·giparangni bimungko segatani somaiara, Jisu Kristoko bebera·e jokataniko man·ani somaionin ong·aha (Luk 10:20; Philippirangna 4:3). Da·onin Kristoni janggini kitapo seako man·aniara an·chingni Salgini songnoko napaniko ong·chongmotaha ine ka·dongata (Parape·a 21:27^b).

 

iii)  Kristoni Janggini Kitapo Segiminara Gimapilama Gimapil·ja?

Kristoni janggini kitapo segiminko kimitpilja ine Parape×a 3:5-o agana. Ia janggini kitapo bebera·gipako bimung segatanian Kristoan bebera×gipako jringjrotna an·tangni ong·nasa seahani gimin uko kimitpil·ja, aro ua mandeni jokatanikoba galpilja.

 

iv)  Kristoni Janggini Kitapo Sea Man·giminrangsan Salgi Gital aro A·a GitaloNapgen

Kristoni janggini kitapo sea man·giminrangsan salgi gital aro a·a gitalo napgen (Parape·a 21:27^b) ine Sastroo rongtalen agana. Ua Kristoni salo, Gitel Jisu an·tangni segimin manderangko Pagipa Isolni aro sagrerangni mikkango ku·rachakgen (Parape·a 3:5^b), aro uamang Gitel Jisu Kristo aro Pagipa Isol baksa jringjrotna uano donggen (Parape·a 21-22).

 

v)    Kristoni Janggini Kitapo Sea Man·gijagiparangna Mai Ong·skagen?

Kristoni janggini kitapo sea man·gijagiparang Kristoni bobil (Anti-Christ)-ko olakkigen (Parape·a 13:8, 16; 17:8). Uamang 666 numberko ra·gen aro Kristoni bobilni dolo naptokgen (Parape·a 13:16-18). Chon·kamao uamang wa·alni wario jringjrotna kingking sal wal sastiko man·gen (Parape·a 20:10^b; 14, 15; 21:8^b)

 

Bon·kame Aganani

Kosako me·sokgimin Sastrorang bebera·giparangko Isolni Gisik Rongtalgipachi mohor su·e aro Kristoni janggini kitapo segate donaniara uamangko jokatani jringjrotnan ong·aiaha ine ka·dongsranganiko on·a. Ia indake bebera·gipako a·kange donaniara Isol an·tangni jokatgimin mandeko pangnan nirok simsake aro naljokate rakkia ineba sakiko on·a.

Unigimin jokatani gimin aganode, mandeni janggiko jokatani kamara Isolni kaman ong·a, Uan mandeni janggiko jokata aro jokgiminko an·tangan rakkikam·a. An·ching Uni agangimin kattarango ka·donge an·chingni bebera·aniko bilakatroroatna nanga. Isolni jokatani kamranga mairongpilgipa ong·a aro ian Uni ka·sachakani kam ong·chongmota. Isol nang·na patiangchina.

About the Author

Sengban M Momin is an author who formerly worked as a pastor in two churches for 10 years. He has a passion for God’s mission and love to share the Word of God. He has authored few books in his own language (Garo) including his best book Isolni Ka·saae Jokataniko Bebera·e Janggi Tangani (Living by Faith in God’s Gift of Salvation). He presently lives with his wife and a daughter in Tura, Meghalaya, India.