Stewardship-ara maia? Stewardship inode maiko miksonga? Ia sing·anirangna an·ching mandeni chanchiani gita chanchijawa, Bible-o jeko janapaha ukosan am·sandie nigen. Bible-o Stewardship-ara Isolni ka·tongoni skanioni re·baa. Isolara nokgipa, mandeara Isolni pilak dakgimin aro ong·atgiminrangko rakkigipa ba nirokgipa ong·a. Ia a·gilsako mandeko dakani ja·pang ja·dilan Isol an·tangni pilak dakgiminrangko nirok simsakchina ong·a. Maiko aro maidake Isol mandena nirokani kamrangko ka·china ge·etaha, Bible-ni kattarangoniko sandie nianggen.
1. Stewardship Katta-ni Orto
Webster’s New Collegiate Dictionary-o talata, stewardship katta-ni orto-ara “dal·gipa nokdango nokni kamrangko ka·na donako man·gipa.” Ia Dictionary-o agana gitade Steward-ara sakgipin-ni gamko nirokgipa ba rakkigipa ong·a.
Niam Gitcham Sastro-o “nokdangni kosakogipa” (over the household) ine agana (Hebrew: al-habbayit, e.g. 1 Raja 4:6; 16:9; Isaia 36:3).
Niam Gital Sastro-o “rakigipa ba nirokgipa” (manager or steward) ine agana (Greek: oikonomoi, e.g. Luk 12:42; 16:1). Galatiarangna 3:24-o Watata Paul-ni “rodilgipa” (English: tutor) ine toe agangipa kattara saniba nokni bi·sarangko rodilgipa (Greek: paidagogos) ine miksonga.
Ia kosako talatgimin Bible-ni kattarangoniko ra·dime aganon, stewardship-ni ortoara Isolni dakgimin aro ong·atgiminrang pilakko nirokna ba simsakna donako man·gipa ong·a.
Ø Stewardship-ni nambatgipa Sastroo-ni golpode Joseph-ni janggi tangani ong·a, jean Potiphar-ni nokko nirokgipa ong·a (A·bachenga 39:4-6).Uoniko nirokgipani kam aro bewalrang maikai ong·na nanga, namgipa skie ra·aniko man·a.
2. Niam Gitcham Sastroo Stewardship-ni Gimin Chanchiani
Ibri jat-nade stewardship-ni gimin chanchiode, Isoloni a·bachenga aro Uon bon·a. Isolan dakgipa ong·a aro nokgipaba ong·a. Manderangde Isolni dakgiminrangko jakkalchina on·ako man·pagiparangsan ong·e, Isolni ka·sachake donako man·e Uni ge·eta gita ka·pagiparangsa ong·aia. Ia indakgipa ma·siani Niam Gitcham Sastroo gimikon donga.
A·bachenga odhai 1 aro 2-rango Adam aro Hoba-ko dakgiminrangni kosako pamong ong·e donaha. Dakgiminrangko nirokchina Isol an·tangni pal mandeko donaha. Matburingrangko biming mingchina Adam-na on·ani aro a·a-o gapatchina bilko on·ania, Isolni baltigiparang ong·na mandena bilko on·aniko me·soka indiba nokgipade Isolan ong·a. Jensalo Adam aro Hoba Eden barioni rikgalatako man·a, unon Isolni agangimin/on·gimin dai-ko uamangni chu·sokatgijaniko me·soka (A·bachenga 3)
A·bachenga 14-o Melchizedek-ni Abram-na patianio uni kattarangko nika, “Salgi aro a·ani nokgipa, chubatgipa Isolni patianiko Abram man·china” (A·bachenga 14:19). Ua somaio Abram Melchizedek-ni jako bakchikkingni baksako on·ahachim. Bakchikingni baksako on·ani-ara Isolni pilakni nokgipa ong·aniko me·soka.
Deuteronomy 25:19-o a·a Isolni ong·a ine manderang ma·sia. Manderang dikdiksana a·a-o dongpagiparangsan ong·aia. Uni gimin manderang a·a-ko an·tangtangni namnika gita dakna bilko man·ja indiba Isolni donako man·e aro ge·etaniko man·e, uarangko nirokgipasan ong·a (be good stewards of the resources God had entrusted to them). Iano pangchake Isol a·a-ni pilak niamrangko tariaha.
Skanggipao, A·ako bilsi dok-na game ge·e jakkalchina ge·eta. snigipa bilsiode a·a-ko gamja ge·jachina agana. Ua gamgijani bilsio kangal manderang ua a·a-rangoniko cha·aniko ra·skachina aro agitchagiparangko matburingrang cha·china (Re·ongkata 23:10,11) dona. Bilsi dok-o game ge·e man·gimin cha·anirangan snigipa bilsio neng·takmitingona chu·onggen ine ia niamchi Isolan manderangna an·tangni pilakni gitan on·gipa (patigipa) ong·aniko me·soka. Manderang an·tangtangni nangana an·tangtangan chimonga inani pal Isolo ka·dongna nanganiko me·soka. Indiba Israil manderang ia Isolni snigipa bilsio neng·takchina ge·etaniko ja·rikna gualaha. Jensalo uamang Babylon-ni manderangchi rim·gittangako man·aha (Jerusalem-ni ga·akani: 586 B.C), ua somaio, “ua a·song neng·takani salrango kusi ong·e dongjana kingking” (2 Serikani 36:20-21) ine agansoa chu·sokaha.
Gnigipao, “bilsi sni changsni” –ko chane bilsi sotbri sku ong·ani ja·mano bilsi sotbonga gipako man·ani (the year of Jubilee). Ia bilsi gimikko Isolna rongtalate on·kanga aro gital a·bachengani ine dona (Levirangni 25:8-54). Ia bilsio a·pal donako man·gipa aro branggiparang noktangona re·angpila, grorangko kema ka·a, a·ako man·chenggipa nokgiparangna(bondok ra·giparangko) on·pila. Iako dakani ortoara Isolan a·ani nokgipa ong·a, darangba an·tangni ine kangna man·ja. A·ako palkamna man·ja, maina manderangara agital aro songdongpaigiparangsan (Levirangni 25:23) ong·a.
Gitrang 24:1, 2-oba janape ring·ani donga, jean uamangni gisiko stewardship-ni gimin name ma·sianiko me·soka, “A·a Jihovanin ong·a, aro uni gapani; A·gilsak aro uno donggiparang. Maina sagalrangni kosako ua uko ja·pang dake donaha, aro uko chibimarangni kosako pangrakata.”
Gitrang 50:10-12-o Isol agana, “Maina pilak matburingrang angnin, aro hajal a·dingrango donggipa jillanirangba. A·brirangoni pilak dodrangko anga u·ia; aro a·baoni matbhuringrang ang baksa donga.”
Haggai 2:8-o Isol agana, “Rupa angnin, aro sona angnin” (cf. 1 Serikani 29:16).
Isolni Nokgipa Ong·aniko Uamang Rakkiaha: Uamang bakchikingni baksa aro on·anirangko on·china draatanichi Isolni nokgipa ong·aniko rakia. Iano rokom gittam bakchikingni baksako on·ani donga. (i) Levirangna bakchikingni baksako on·ani (a tithe for the Levites(Chanani 18:21-24), (ii) gama ge·anioniko man·aniko maniani salo bakchikingni baksako on·ani (a celebration tithe of agricultural products: Deuteronomy 12:6,7; 14:22-26), aro (iii) kangalrangna bakchikingni baksako on·ani (a charity tithe: Deuteronomy 14:28, 29).
A·gilsakna mikpakma niana bate Isolni pilakni nokgipa ong·anina kusi ong·e uko olakiani ka·tongchi on·anian mongsongbatgipa ong·a. “Unon manderang an·tangtang kusi ong·e on·ahani gimin katchaaha, maina uamang ka·tong sronge kusi ong·e Jihovana on·aha” (1 Serikani 29:9). Iano Daud raja namen katchaaha(1 Serikani 29:14-18).
Ia kosako man·bagimin, Niam Gitcham Sastroo stewardship-ni gimin ming gittamko janapaha:
1) Isolan pilakni nokgipa ong·a
2) Isolni manderang Isolni on·enggipa pilakkon name rakkina daiko ra·na nanggipa ong·a
3) On·anichi Isolko olakianiara Uni pilakni nokgipa ong·aniko me·soka.
3. Niam Gital Sastroo Stewardship-ni Gimin Chanchiani
Luk 12:42-48: Kakketgipa aro kakketgijagipa nokkolrangni gimin toe aganani-o Isolni nokgipa ong·aniko me·soka; uan Niam Gitchamo janapgimin an·chingni skie man·bagimin gita apsan ong·a. Isolni songnokni re·bana skang kakketgipa nirokgipani kamko ka·na nanganiko miksonga.
“Manager” (nitimgipa: Greek katta: oikonomos) ingipa katta-ko Luk 12:42-o janapa gitade stewardship-ara tangka on·giminrangko namedake rakkitimgipa ba nirokgipa ong·a.
Luk 16:1-8: City treasurer-rang gita, uamang an·tangtangni gam ong·jaoba, uarangko name simsake rakkina uamangni dai ong·a. Jisuni iako aganani ortoara, Isolni manderangde dai (responsible) aro hisape rakkitimgipa (Accountable) Steward-rang ong·e janggi tangchina ge·etaniko man·aniko miksonga. Isolni Songnok re·baon (ambin Salgio) boksis sualako man·pachina (p.44) indiba kam ka·jaode sasti (p.46)-ko man·gen. Namedake nirokani kamko ka·giparang namgipa boksis-ko man·gen.
Minggipin dake niatna, Stewardshipgimin aganon, gamko nitimani giminsan ong·aia ong·ja. 1 Korinthirangna 4:1-o Kristian kam ka·giparangara Isolni steward-rang ong·a ine agana. Titus 1:7-o me·aparangko Isolni stewardrang gita nirokgiparang ong·a ine agana. Watata Paul agana, mondolini dilgiparanga Isoni mondoliko namedake hisape nirokgipa ong·na donako man·gipaang ong·a ine agana. 1 Pitor 4:10-o “Sakanti ka·sae on·aniko man·aha gita, Isolni ma·mantini ka·saani, nama nokol pamongrang gita, uko na·simangni gisepo dangdike on·china…” Isolni on·sogimin (maidake kamko ka·china donsogimin) gita dangdike on·na nanggiparang ong·a(p.11).
Gisik Rongtalgipani ka·sae on·airangko man·e (1 Korinthirangna 12), uarangko maikai jakkala uani kri hisapani donggen; bon·kamao name simsake jakkalgipana nama dormahako on·gen ine agansoa (Mati 16:27; Rom. 14:10-12; 1 Kor. 3:10-15; 2 Kor. 5:10). Gisik Rongtalgipani ka·sae on·gimin gunrangkoba an·ching namgipa stewardrang gita simsake jakkalna nanga. Jakkalgija galchipna nangja, aro namana jakkalna nanga ine iano miksonga.
Unigimin “Kotokrangni Jihova indine agana, Na·simangni re·anirangna gisik nangbo” (Haggai 1:7)
Kosako talatbagimin kattarangoniko bikongkate gisiko chinapatna gita ka·mao me·sokataenga: Isolni dongimin kakketgipa Steward-ara
Gisikko nirokgipa
Somaiko nirokgipa
Ka·sae on·anirangko nirokgipa
Gamko nirokgipa
A·a aro chirangko nirokgipa
Matburingrangko nirokgipa
Ka·dongchakgipa nirokgipa
Kosako jerangko poraibaaha, namedake chanchibewale niaha ine anga beberaa. Stewardship-ara maia? Ia kattarangko poraina skangde na·a stewardship-ni gimin gisik nangani dongjachimma? Mandeara ia a·gilsako ong·bewal gita atchiaha, tangna nanga gita tanggen, sina nango siangaigen ine chanchiengachimma?
Kosako chanchibagimin gita, Isolni mandeko dakaniara baditan gamchata aro su·ua uko name chanchie niosa ning·tue ma·sina man·a. Ia a·gilsakko(Isolni ong·atgimin aro on·giminrang gimikko man·gopa) nitimgipa ba nirokgipa ong·na mandena bilko on·aniara Isolni aiao inmanpile ka·saani kam ong·an baksa Isol baksa kamko ka·na mandena cholko on·anisa ong·a. Isolni dakgiminrango nitimgipa ong·na donako man·aniara baditan nama. An·ching iako ma·sie, Isolna da·alo maiko aganchakgen? Da·ode angaba Apa Isol nang·ni dakgiminrangna ka·saae uarangko nirok nitimgnok ine ku·rachakgnokma?
