COVID-19-NI SOMAIO ISOLO KA·DONGE BI·ANI (A List of Prayer During COVID-19)

COVID-19 ian mandeoni mandeona ta·rake batrikrikna man·gipa sabisi ong·a. A·gilsakni bang·a biapona salprakon ia sabisi hajalni hajal manderango batrikrikengaha. Ia sabisi-ko chelchakna a·gilsakni dilgiparang rakbee kam ka·enga. Ia rakbegipa somaio bang·a manderang Isolo bi·chakaniko dakenga. Chingaba ka·mao bi·ani itemrangko minge Isolo bi·enga. Saoba ia Isolo bi·ani itemrangko minge bi·pana skode, bi·china chinga nang·ko didia.

“Gitel sepangon. Mamungnaba sintenabe; indiba mitelan baksa bi·achi aro mol·molachi Isolna pilakni gimin na·simangni man·na nanganirangko u·iatbo.” Philippirangna 4;6-7.

1. COVID-19 SAA MAN·E SIANGGIPA MANDERANGNI DONGGRIKGIPA NOKDANGRANGNA: Apa Isol, uamangni dukrangko chelchakbo aro uamangko naljoke rakkibo.

2. Covid-19 SAA MAN·GIPARANGNA: Apa Isol, uamangko an·sengatbo aro uamangna dakchakbo. Uamangni be·enrangko aro gisikrangko rakkibo.

3. COVID-19 BATNA ALTUAGIPA MANDE JINMANA: Apa Isol, bilsi brigipa aro gipin saanirang donggipa manderangko naljoke rakkibo. Uamango ia Covid-19 sabisi saa napjachina. Uamangoni kangal manderangna patibo.

4. CHADAMBE ARO BILAKGIPARANGNA: Apa Isol, uamango ma·sisrapgija sabisi nape sabisi gipangaoniko champengna uamangko rakkibo. Sakgipin bilgrigiparangko dakchakna uamangko gisik raatbo.

5. GITTIM, DISTRICT, STATE ARO A·SONG-NI DILGIPARANGNA: Apa Isol, chingko re·dilenggipa dilgiparangna dakchakbo, uamangchi manderangna nangchonggipa kamrangko aro simsak nirokanirangko dakenga. Uamangko an·sengbaljoke rakkibo. Uamango manderangna dakchakna, tangka paisa aro bosturang chu·onge dongchina. A·songni manderangko ka·saae nirok simsakna uamangna gisikko on·bo. Kangal cholgrirangna chaani aro ringanirangko supply ka·na cholko on·bo.

6. COVID-19 SAAKO NAMATNA SAMKO TARIGIPA MEDICAL SCIENTISTRANGNA: Apa Isol, uamangna gisik a·ningbitani bilrangko on·bo. Ia sabisi-ko gimaatna chong·motgipa samko bikotna cholko on·bo.

7. MEDIANI MANDERANGNA: Apa Isol, ia sabisini bidingo aro dingtang dingtang kobor ba u·iatanirangko manderangna on·na uamangna dakchakbo, jedakode uamang manderangna chong·motgipa u·iatanirangko on·na man·gen aro manderang kenjagokjawa, simsake dongna man·gen.

8. NOKGRI JAMGRI MANDERANGNA: Apa Isol, uamangna dongchakna nok jamko patibo. Uamangna cha·ani aro ringaniko on·bo. Uamang saksa sakgipinoni cheltanggrike dongna dakchakbo. Uamangko sabisioniko jokatbo.

9. GIPIN SONG BA SONGJINMAO JACHANGGIPARANGNA: Apa Isol, jeo biapo jachangoba, ua biapon uamang dongchina aro sorkari manderangni naljoke rakkianiko man·china.

10. KRISTIAN MISSIONARYRANGNA: Apa Isol, nang·ni gimin sakki on·enggipa missionaryrang jemangan ia sabisi bilonggipa biapo dongenga, uamangko ia sabisioni naljoke rakkibo. Uamangna ka·donganiko on·bo aro uamangni sambeng ketchio donggipa gipin manderangna ka·saana aro dakchakna cholko on·bo.

11. COMPANY ARO INDUSTRYRANGO KAM KA·GIPARANGNA: Apa Isol, uamang tangka paisa man·ggija neng·nikaniko man·engon, uamangna ka·dimeaniko on·bo aro uamangna dakchakbo.

12. SEGRI ARO PAGRIRANGNA: Apa Isol, segri aro pagri-rangko chelchakbo aro uamangna ka·sagipa aro nirok simsakgipa manderangko watatbo.

13. REGULAR SANA BANANIKO DAKENGGIPARANGNA: Apa Isol, uamang regular sana bananiko dakna man·jaengon, uamangni be·enni saanirangko an·sengate rakkibo.

14. UNIVERSITY ARO COLLEGE-NI STUDENTRANGNA: Apa Isol, je studentrangni poraiani course dingtangenga, mitamni cancel ong·aha, porika resultrang ja·manchakgen: uamangna ka·donganiko on·bo.

15. MIKKANGCHAKAO KAM KA·ENGGIPARANGNA: Apa Isol, ia sabisiko chelchakna mikkangchakao kam ka·e on·enggipa Doctor, nurse, pharmacy  aro health workerrangna:

• Apa, uamangna naljokaniko on·bo.
• Apa, uamangko an·sengbaljoke rakkibo. Uamangni nokdangrangko an·sengbaljoke rakkibo.
• Apa, sana bananiko dakengon, namgipa sana bananiko dakna uamangna ma·sianiko on·bo.
• Apa, sagiparangko ka·sae sanna uamangko dilbo.
• Apa, uamangni noko dongenggipa bi·sarangko ka·dongatbo.

16. PILAK MANDERANGNA/KRISTIANRANGNA: Apa Isol, Apa Isol, ia neng·nikbeani somaio bi·na, on·na, ka·saana, dangdike on·na, aro Nama Kattako aganna Nang·ni Gisik Rongtalgipachi chingko didibo.

17. APA ISOL, NENG·NIKAO GA·AKGIPA MANDERANGNA TANGKA PAISA ARO BIL JAKCHI DAKCHAKENGGIPA MANDERANGNA NANG·NI KA·SAE DAKANIKO ON·SKABO.

Apa Isol, Nang·ni ka·sachakani, patiani aro aiao inmanpilgipa an·sengatani bilrangko pilakchin ma·sichina. Gitel Jisuni bimungo bia. Amen.

About Author

Sengban M Momin is an author who formerly worked as a pastor in two churches for 10 years. He has a passion for God’s mission and love to share the Word of God. He has authored few books in his own language (Garo) including his best book Isolni Ka·saae Jokataniko Bebera·e Janggi Tangani (Living by Faith in God’s Gift of Salvation). He presently lives with his wife and a daughter in Tura, Meghalaya, India.