An·ching sakantian kusi ong·aniko nanga. Kusi ong·osa an·ching jeko chanchioba ta·raka aro je kamko ka·oba name matchotatna man·a. Mandena jedake be·en bimang an·senganiko nanga ua gitan gisikni an·senganiko nanga. Apsandake gisik an·sengjaode mandeni be·enni bakrang gimikan an·sengja.
Kusi ong·aniko baoniko man·na amgen? Tangka paisa bang·oba, na·a kusi ong·kamna man·genma? A·gilsakni an·senganirangchiba na·a kusi ong·kamna man·genma?
Angni janggi tanganio nikpaanide, Isol baksa janggi tangana agre, gipino nambata kusi ong·ani dongja. Anga maikai kusi ong·aniko man·ronga, anga na·simangna aganna kusi ong·bea. Angni bilsi da·o 43 ong·aha, angni Jisu Kristoko ra·chakaoni da·o bilsi 21 ong·aha. Anga pagipa ong·e janggi tanga bilsi 5 ong·engaha. Anga nokdangni pagipa ong·e, batanggimin salrango nokdangni manderangko maikai kusi ong·e janggi tangdilna jotton ka·aha? Gipinrang gitan, anga altuae (neng·ani gri janggi) janggi tanggipa ong·paja. Salantian ango tangka paisa aro gamjin-ni gita chu·onggijanirang donga aro gisikni bilgrianirang donga. Unbaksa kam ka·anirango chu·sokgijanirangchi anga neng·atako man·ronga. Anga sko rim·e mikuak kuak dake mikchi baksa dongarang baditan bang·aha. Ia pilak obostarangko chanchiaton, anga Paa Isolko mitela; maina pilak neng·nikaniko chagronga changantion Ua angko ka·dongbatrikrikataha, angna ma·sibatrikrikaniko on·aha, aro an·tangko kimkime rakkina angko choliroroataha. Angni be·en neng·beoba, angni gisik ka·tong pangnaba ga·akamjaha; Gitel Jisu angbaksa donge angko ka·dongataitaiaha.
Ia angni chagronggimin obostarango anga maikai kusi ong·aniko man·ronga iano ming 5 (bonga)-ko agane on·paenga. Iarangan Isolni angna kusi ong·na on·gipa japangrang ong·a.
1. Isolni Kattako Ja·rikachi (Follow the Word of God)
Gitrang 1:1, 2: “An·senga ua mande, … (jean) Jihovani niamo uni ka·srokani ong·a, Aro uni niamko sal wal ua chanchibewala.” (cf. Toe Skianirang 29:18).
Isolni kattarangan angni chanchianiko ganggopronga. Maiko dako nama, maiko dako namja aro neng·nikaniko maikai warachakgen aro cheaniko man·gen, ia pilak obostao Isolni kattaan angni ka·tongko dilronga.
Da·alo, na·a ango sing·ode, Na·a maikai kusi ong·aniko man·ronga? Anga iako agangen, anga Isolni kattako ja·rike Isolni dilaniko man·e janggi tangachi kusi ong·na man·a. Namgijagipa a·sel obostaoniko angko rakkirikgipara Isolni kattaan ong·a, angni dukko namatpilgipaba Isolni kattaan ong·a aro angna ka·donganiko on·taitaipilgipaba Isolni kattaan ong·a, unigimin angni kusi ong·ani ja·pangde Isolni kattako ja·rikachi ong·a.
Isol kattaan mandeko gisik gnangata, mandeko ka·dongata, mandeko ka·dimeata, mandeni changgija sapgija somaio mandena dakchaka. Mande Isolni kattao janggi tangachi, jajrengani aro kena sim·ani salrongo ka·donganiko man·a.
2.Isolo Ka·donggipa Ong·achi (Trust in the Lord)
Gitrang 146:5: “An·senga ua jean an·tangna dakchakani ine Jakob-ni Isolko man·a. Ua jeni ka·dongara uni Isol Jihovao ong·a.”
Isolo ka·donggipa ong·ani gimin aganengon, tangka paisa donggijamitingo anga maikai Isolo ka·donganiko ranta ka·aha uko iano aganna kusi ong·a. An·ching ma·sia, ia chasongode tangka paisa dongjaode janggi tanga namen neng·bea. Angni janggi tanganioba tangka bon·changarang bang·en dongaha, ua somai-rango Isol angna maiba dakchakanikode man·tela. Iano mingsa obostani gimin anga agangen.
Salsao angni kam ka·gipa biaponi Tura-ona re·bana nangchongmotaha, indiba angni car-o petrol chu·ongjaha, car-o je petrol donggipachi re·ode, Anogre jolonasan sokaignokchim, petrolko brenaba angni jako tangkaan Petrol litre-sako brenan dongjaha. Unon anga Isolna aganaha, “Anga Nang·ni nokkol, da·alo Turachi re·enga, na·a jekoba dakbo, car-o petrol dongjaoba angade jeona soka re·telaignok.” Re·chakatna dakmitingo, saksa mande re·bae aganaha, “Pamong, nangni mijao kitap palna on·atgipa tangkako nang·na ra·baachim.” Uni ra·bagipa tangka bang·jaoba, petrolna mangmangde chu·ongaha.
George Muller saksa mingsinggipa missionary ong·a, uni janggi tangaoniko anga skie ra·na namnika, ua pangnan tangka dongjaoba, cha·ani dongjaoba indake aganronga, “Isolan on·aigen”. George Muller-ba dormahako chu·onge man·pagipa ong·ja, ua Isolo ka·dongachi kusi ong·ronggipa ong·aha.
Tangka paisa dongchanggijani salrango, senggnang on·sojaoba, da·alni nanga-o ba sal somai sokjoko Isolan jeonikoba man·e on·a ine anga ma·siaha. Maibakai nangani salo angni nangnikgipako man·ja ong·ode, uan Isolni ska ong·ja ine anga ma·siaijok.
Tangka paisani obostaosan ong·ja, dingtang dingtang a·sel obostarangoba, Isol maming saloba an·tangni mandeko watgalja.
3.Chu·ongnikgipa Ong·achi (Be a contentment)
“Aro chu·ongnikan baksa olakiara bang·a mandapani ong·a. Maina an·ching mamungkoba a·gilsakona ra·bajachim, aro mamungkoba ra·angnaba man·ja, indiba cha·ani aro gana chinani gnangode, uarangko an·chinga chu·ongnikgen.” (I Timothyna 6:6-8).
Anga 2018 bilsionisa smartphone-ko jakkale nikbapaa. Ua bilsina skangonin smartphone-ko jakkalpana ine jotton ka·paoba tangkakon chamon tikatjae brepana man·jaha. Iasan ong·ja, bang·a bostukon manderangni jakkale bilsi ru·utangpilahaosa bree jakkalpana man·rongpaaia. Ia indakgipa obostao janggi tangna nanggenoba, anga duk ong·ja aro kratchaja. Isol jeko angna on·enga uako chu·ongnika. Tangka paisa agitchae dongjaoba aro nok-jam, gam-jin dongpajaoba, da·alna aro knalna cha·aniko man·jokode anga kusi ong·bea.
Tangka dongbebeoba jegita tangka ua gitan nangnikanirang bang·baskaigen. Mamungkon chu·ongbejok inani dongjawa.
Unigimin anga mandena nangchongmotako (cha·ani aro gana chinani) man·jokon chu·ongnikna jotton ka·ronga. Indake chu·ongnikani dongode anga kusi ong·na man·a. Isolni kattaoba chu·ongnike janggi tangchina agana, ia a·gilsako bang·bea tangka paisa aro gamjinrangko chimonge donna man·oba, uarangchi kusi ong·na man·ja, aro a·gilsako bang·bee gam chimongoba, salgichina mamung gamkoba ra·bitangna man·jawa. Salgichi ra·bite re·angna man·gnigipade Isolni kattao janggi tangani aro badita kamko Isolna aro manderangna ka·angna man·a uani krisa ong·gen.
4. Kema Ka·achi aro Kema Watgiminko Gisik Ra·taigijachi (Forgive and Forget)
“Maina na·simang manderangni namgijarangko watode, na·simangni salgini Paa na·simangkoba watgen. Indiba na·simang manderangni namgijarangko watjaode, na·simangni Paaba na·simangni namgijarangko watjawa.” (Mati 6:14-15).
Anga man·a dipetde darangkoba gisik saatjana jotton ka·ronga, indiba basakobade angni agangipa kattarangchi aro kamrangchi manderangni gisikko saatmanaia. Anga gualaniko dakmanode anga kema bi·na jotton ka·ronga.
Manderangoni angni kosako maiba namgijako dako anga maiko dakskagen? Manderangoni saobade, basakobade, angni kosako maiba namgijako dakgipa dongtela. Jemangan angko namnikjaenga, angko jeenga, angko ga·akatna tikkelenga aro angko bobil dakenga, uamangko kema ka·anian angni namgipa gun mingsa ong·a. Uamangni ango kema bi·ako anga nangnikja, uamang ango kema bi·jaoba, anga uamangko kema ka·ronga. Uamangni namgija kamrangko angni gisikoba rakkina sikja. Uamangko kema ka·e donronga aro uamangni namgija kamrangko gisik ra·ja.
Ia indakgipa obostarango maikai an·tangtangko kusi ong·e rakkigen? Angade Isolni kattarangko poraie kusi ong·na man·ronga. Gitel Jisuba angni namjaoba, angko salantian kema ka·a aro angni namgijako gisik ra·e aro chane dongchaja (Romrangna 4:7-8). Ua angna gital gital gisikni nikanirang aro an·senganiko on·ronga.
5.Somaianti Kusi Ong·ani (Enjoy Every Moment)
“Gitelo pangnan katchabo; pil·e anga agangen, Katchabo.”( Philipirangna 4:4).
“Silangani salo katchabo, aro namgija ong·ani salo chanchibo; … Isol mingsako minggipin baksa sepanggrike dakaha.” (Aganprakgipa 7:14).
Namgipa obostarangko man·jaon duk ong·ani aro ka·a nangani sokbaa, indiba anga Isolni kattachiko niate, aro Gisik Rongtalgipani dilanichi pilak obostaan namgninasa ong·a ine ka·donganiko man·ronga. Ia namgija obostarangchi dukko man·e dongana bate, uarang angni janggi tanganio maiba nama kamna tikkelna nanganiko aro namatani cholko gisiko nikskaa. Namarara ong·aiode namatna kam ka·na nanganian dongjawa ine anga gisiko done, pangnan ka·dimeaniko man·ronga. Namgija obostarangde angko bilakatnasa aro cholibatatnasa ine anga an·tangde ra·a.
Angni aganbagimin ming bri (Isolni kattako ja·rikachi, Isolo ka·donggipa ong·achi, chu·ongnikachi, kema ka·achi)-ko dakrongode, ia bongagipa-o agana gita somaiantion kusi ong·e janggi tangna altubata.
Je a·sel obosta ong·oba, Isolni jakosa aro Isolan maikoba mangsongani donga, unigimin anga Isolna pakwate somaiantio kusi ong·e janggi tangna man·ronga.
Bon·atani
Angni janggi tangao, oe pangnan ka·dingsmitkame dongnade man·ja. Basakoba duk aro grapani, basakoba ka·a nangani aro basakoba ka·donggijanirangba dongaia, indiba ango uarang pilakan dongkamja. Maiba dukni obostako chagrongoba, salnapgijan anga an·sengpilaniko man·ronga. Pring seng·jokon Isolan angna gital gisik aro ka·dongani kattarangko on·ronga, unon mijalni obostako anga gualaijok.
Pilak a·sel obostarangna an·tangko baljrime ra·jachina Isol an·chingna agana. Pilak sinteako Gitel Jisu-ona galgopan baksa an·chingni nanganirangko Una aganchina agana (I Pitor 5:7; Philipirangna 4:6). Uni gimin ripengrang, an·ching duk aro jajrengani, neng·nikani, bobilrang sokbaani, obostarango uarangko an·ching an·tangtang chile dongjana, an·chingni Gitel Jisuna galgopna hai. Unon Gitel Jisu an·chingni balrangko an·chingoniko ra·anggen aro an·chingna ritchenganiko on·gen. Gitel Jisu indake agana,
“Pilak gamgipa aro bal jrimgiparang angona re·babo, anga na·simangko neng·takatgen.” (Mati 11:23).
An·chingko salantio kusi ong·e janggi tangatna an·chingni Gitel Jisu-ni skani ong·a. Isol nang·ni aro angni duk ong·simsime ba ka·donggija donganiko nangnikja.
Na·a mainiba a·sel duk ong·e dongengnaba donga, indiba da·alo ia ming 5 Isolni kattarangoniko poraie na·a Isoloniko ka·donganiko man·aha ong·ode, Isolko mitele bi·bo. Iano Isolo bi·ani rokom gniko me·soke on·enga. Skanggipara duk ong·engmitingo Isolni dakchakaniko man·na bi·ani aro gnigipara Isolni dakchakanina mitelpile bi·ani ong·a.
Duk Ong·mitingo Somaio Isolni Dakchakaniko Man·na Bi·ani
“Apa Isol, anga duk man·gipa ong·a, maina anga ….(na·a maini gimin duk ong·enga uko janapbo)-ni gimin duk ong·enga. Na·a angna ka·sachakbo, angni pilak duk mikchi aro balrangko Nang·na galgopa. Ango paprang dongode angni paprangkoba kema ka·bo aro angni ka·tongko gital ong·atbo. Anga kusi ong·gipa mande ong·na ska. Angni jrimgipa balrangko angoniko ra·angbo. Angko chu·gimik an·senggipa mande ong·atbo. Anga da·alo Nang·ni kattarangko poraie, angni ka·tongni jrimgipa balrang ritchengatako man·enga. Nang·ni angko ka·dongatanina aro angni mikchirangko u·sitanina anga Nang·ko mitela. Angko pangnan Nang·ni sambao donbo. Angko pangnan Nang·ni kattarangchi ka·dongbatrikrikatbo. Gitel Jisuni bimungo bi·a, Amen."
Isolni Dakchakanina Mitelpile Bi·ani
“Apa Isol, anga nang·ko mitela, na·a angni duk mikchi, jajrengani aro ka·donggija ong·aoniko angko an·sengataha. Anga da·alo Nang·ni kattarangko poraie Nang·o ka·dongpilna man·e kusi ong·beaha. Nang·ni angko ka·dongdapatanina anga Nang·ko mitela. Na·a pangnan angko watgalja ine anga bebera·a. Nang·ni angna ka·saae angko rakkianina anga nang·ko mitela. Gitel Jisuni bimungo bi·a, Amen."
About Author
Sengban M Momin is an author who formerly worked as a pastor in two churches for 10 years. He has a passion for God’s mission and love to share the Word of God. He has authored few books in his own language (Garo) including his best book Isolni Ka·saae Jokataniko Bebera·e Janggi Tangani (Living by Faith in God’s Gift of Salvation). He presently lives with his wife and a daughter in Tura, Meghalaya, India.
