Isolni jokataniko an·chingni man·aniara basakoni ong·a? Ia sing·anina aganchakode, je somaioni an·ching gisik pil·e Isolni Depante Jisu Kristoko bebera·aha, ua somaionin an·ching jokatako man·aha. English Grammar-o ‘ong·giminko’ Past Tense minga.
Sastroo bebera·gipako ‘jokataha’ ine agangipaba Past Tense ong·a, chong·motan bebera·gipade ‘jokgimin ong·aha.’
“Jokataha” ingipa kattako Ephesusrangna 2:8-9-o agana, “Maina ka·saao bebera·achi na·simangko jokataha; aro ua na·simangoni ong·ja, Isolni on·asa; pilakba gaora de·jachina, ua kamoni ong·ja.” Ia “ka∙saao” ingipa kattara, Isolni ka·sachake Depante Jisuko on·chakaniko miksonga, aro “bebera·achi” ingipa kattara Isolni ka·sachake on·gipa Depante Jisuko bebera·aniko miksonga. Ia ‘bebera·a’ ingipara an·chingni ka·dongani ong·a. Jokatanina kam ka·gipade Isol an·tangan ka·aha. Pod 5b-o agana, “ka·saachin na·simang jokatako man·aha.” An·ching Jisu Kristoko bebera·ahani gimin Isolni ka·sachakachi an·ching jokatako man·giparang ong·aha (Romrangna 8:24).
Bebera·gipako ‘jokataha’ ingipako Sastroo dingtang dingtang bimang ba kattarango agana. Uarangko poraiachi jokataniara ong·chongmotaha ine bebera·gipa an·tangan ka·dongataniko man·gen.
1. Toromi Chanaha (Bebera·gipako Toromi Chanaha)
“Toromi chanani” kattako Rome-rangni bichal ka·ramo jakkalgipa kattaoniko ra·aha. Ian dosi donggipa mandeko bichal ka·ram biapo bichal ka·e, sastiko man·na kraaoba, uko dos gri ine chanani ba jakgitel watani ong·a.
Romrangna 3:24: “Uamang Jisu Kristoo gnanggipa piokachi indinari uni ka·saachi toromi inako man·a.” Ian Isolni mikkango Jisu Kristoko bebera·gipako toromi ine chanani ong·a. Bichal ka·ani niam gitade an·chingara toromi ong·gijagiparangsa ong·aiani gimin dosi ong·achim (Romrangna 3:10, 23); indiba an·chingni Jisu Kristoko bebera·ahani gimin, Jisu Kristoni toromi ong·anio Uni ka·saachi an·chingko toromi ine Isolni mikkango chanaha. Ia an·chingko toromi ine chananiara an·chingni niamni kamrangchi ong·jaha (cf. Galatiarangna 2:21; 5:4; Romrangna 3:20), indiba Jisu Kristoko bebera·achisa ong·aha (Romrangna 3:22-24; 27; 4:6 cf. Galatiarangna 2:16). An·ching namjabeoba, an·chingni namgijanirangko changija Jisu Kristoni ka·saachi an·chingko Isolni mikkango toromi chanaha (cf. Romrangna 5:16b; Romrangna 4:25; 5:1, 9, 18).
2. Nangrimpilaha (Bebera·gipa Isol baksa Nangrimpilaha)
“Nangrimpilani” kattako ripeng ong·ani aro meli-nangrimanina jakkalgipa kattaoniko ra·aha. Ian ripeng ong·e nangrimgrikaniko miksonga.
Romrangna 5:10: “Maina an·ching bobil ong·eba Isolni Depanteni siachi Isol baksa nangrimpilahaode, bate, nangrimako man·enba, an·ching uni tangao jokako man·gen.” An·ching papni a·sel Isoloni dingtangatako man·ahachim, indiba Isol Jisu Kristochi an·chingko an·tang baksa nangrimatpilataha. Ian Isol aro mandeni be·giminko nangrimatpilani ong·a. Ia nangrimpilaniko on·gipara Jisu Kristoni an·chichisan ong·aha (cf. 2 Korinthirangna 5:18a; Romrangna 5:11; Ephesusrangna 2:16; Kolosirangna 1:20-22).
3. Piokaha (Bebera·gipani Janggiko Piokaha)
“Piokani’ kattako Greekrangni nokkol paldamo jakkalgipa kattaoniko ra·aha. Nokkolko saoba breahaode, ua nokkolko breachi piokaha, aro ua piokgimin nokkol ua piokgipani nokkol ong·skaha.
1 Pitor 1:19: “indiba ong·sigija, simteka gri mes bi·sani gita, Kristoni gamchata an·chichi na·simangko piokaha ine na·simang u·ia” (cf. Romrangna 3:24; 1 Timothyna 2:6). An·ching niamni sao-ni ning·o (papni, siani aro nikgijagipa gisikni bilrangni ning·o) ong·e sinasiengachim, indiba Jisu Kristo an·chingni niamni saooniko piokna an·chitangko on·chakaha (cf. Galatiarangna 3:13).
Jisu Kristoko bebera·gipa sakantiko Uni gamchatbegipa an·chini (Watatarang 20:28; cf. Ibrirangna 9:12; Parape·a 5:9) damchi an·chingni niamni saoni ning∙o ong·aoniko piokaha. Da·ode bebera·gipa sakantian Jisu Kristoni nokkolrang ong·skaha (Kolosirangna 3:24).
4. Papko Wataha (Bebera·gipani Papko Wataha)
“Papko Watani” kattako Jihudirangni boli on·ani bewaloniko ra·aha. Uamangni boli on·achi Isol uamangni paprangko wataniko miksonga.
Ephesusrangna 1:7: “jeo an·ching uni an·chichi piokako, chong·motan an·chingni namgija dakanirangko watako man·aha.” An·chingo donggipa a·bachenggipa papni a·sel bichal (Ibrirangna 9:27) aro sianio ong·engachim (Romrangna 5:12-14). Ia papko kimitna mes aro paroarangni an·chiba man·jahani (Ibrirangna 10:4) gimin, Isol Uni ka·sachakanio an·chingni papko watna Jisu Kristoko boli on·aha (Ibrirangna 9:28; 10:10, 12). Jisu Kristoni on·chakgipa an·chiara ka·sachakani ganchio an·chingni paprangko pindapani ba kema ka·ani gita ong·aha (Romrangna 3:25). Uni chisolara ka·sachakan ganchi gita ong·aha, jean Isol aro mandeni gronggrikani biap ong·a (cf. Re∙ongkata 24:6-8; Levirangni 16:16); Uni an·chiara paprangko rongtalatani ba kimitani ong·a (Ibrirangna 9:12, 14, 22).
5. Deragataha (Bebera·gipako Isol Deragataha)
“Deragatani” kattako nokdangni janggi tangaoniko ra·aha. Deragatani ortoara de chanani ong·a. Greekrangni dakbewal gita deragatahaon, deragatako man·gipana de ong·ani bilko on·a, aro ua gital nokdango chu·gimik bakrimaniko man·a. Ian uni gitcham bilko kimitsrange una gital bilko on·ani ong·a, ba uni gitchamrangko den·galsrange uko gital bimang dakani ong·a. A·chik jatoba, deragata ba deba·a ingipakoba daka. Deragata ba deba·ani somaioni uni siaona kingking ua gital nokdangni degipa ong·aha.
Johan 1:12: “Indiba badita mande uko ra·chakaha, ua uamangna, chong·motan uni bimungo bebera·giparangna, Isolni de ong·china bil on·aha.” Jisu Kristoko ra·chakgipa sakantina Isolni de ong·ani bilko on·aha. “Maina Jisu Kristoko bebera·achi na·simang pilakan Isolni depanterang ong·aha” (Galatiarangna 3:26; cf.
Isolni an·chingko deragatna nangani a·selde, an·chingara Isolni dedrang ong·jahani gimin (Isolni dedrang ine chanako man·kugijagiparang pilakan Satan-ni dedrangsa ong·a: Mati 13:38; Johan 8:38, 41, 44; Watatarang 13:10; 1 Johan 3:10; cf. Ephesusrangna 2:3; 1 Johan 5:19).) an·chingko Isol an·tangni dedrang ong·atna deragataha. An·chingko deragatahaon, Isolni dedrang ong·ani bil aro man·rikaniko dechong·motrang gitan apsan man·aha. An·ching Isolni dedrang ong·e dakgni kamrangoba dakna nanggipa ong·a (Romrangna 8:15-17; Galatiarangna 4:4-7). Ia Isolni an∙chingko deragatani jringjrotnan ong∙aha (1 Johan 3:2).
6. Atchitaiataha (Bebera·gipani Gisikko Atchitaiataha)
Ia “atchitaiani”-ara dongenggipa nokdangko wate, dingtang nokdango gital atchiani ong·a. Jisu Kristoko bebera·gipako Isolni nokdango atchitaigimin ine chana.
1 Pitor 1:4-5: “Bon·kaman salo parape·na tarisogimin jokana bebera·achi Isolni bilo rakigimin na·simangna salgio rakisogimin, sogija, marang gri, surigija man·rikaniona, an·chingko atchitaiataha.” Isolni songnoko napnade atchitaina nanga ine Jisu Kristo aganaha (Johan 3:3). F. W. Harding-ni kitap, Baptist Manual No. 54-o agana, “Gisik Rongtalgipachi atchitaiatako man·jaode, jokaniko man·aniba gri.” Maikai Gisik Rongtalgipachi atchitaiatako man·gen? Gisik Rongtalgipachi atchitaiatako man·anide Jisu Kristoko bebera·achisan ong·a. An·ching Jisu Kristoko bebera·ahaon, Uni an·chichi aro Gisik Rongtalgipani bilo atchitaiatako man·aha (Titusna 3:5; cf. 1 Pitor 1:23), aro Isolni nokdangona ba Depante Jisu Kristoni Songnoko (Kolosirangna 1:13) donatako man·skaha.
7. Gital Ong·aha (Bebera·gipani Janggi Gital Ong·aha)
Ian “gital ong·ani” ba “gilsreani” ong·a. Sastroo jokataniko “gital ong·ani” ineba agana.
2 Korinthirangna 5:17: “Uni gimin saoba Kristoo dongode, ua gital dakgimin ong·a, gitchamrang gimaha; nibo, uarang gital ong·aha.” Jisu Kristoko bebera·antaltal an·chingni gitcham papni kamrangko Uni an·chichi kimitenba (Galatiarangna 5:24; Ibrirangna 10:10, 12), aro an·chingni janggi, gisik ka·tong gimikkon gital ong·ataha (Titusna 3:5; Kolosirangna 3:10). Jisu Kristochi an·ching gital bimang ong·ahaosa Isolni manderang ong·baa (Ezekiel 11:19-20; cf.
8. Jakgitel Ong·ataha (Bebera·gipako Jakgitel Ong·ataha)
Ia “jakgitel ong·ataha” inani ortoara dos donge sastiko man·na nanggipa ong·ahaoba, uni dosko changija uko sastioniko jakgitel ong·atani ong·a.
Romrangna 8:2: “Maina Kristo Jisuo janggini Gisikni niam papni aro siani niamoni angko jakgitel ong·ataha.” Papni a·sel dosi ong·e, siani sastioni jokani chol griahachim, indiba Jisu Kristoni an·chichi bebera·gipani paprangko kimitenba uko siaoniko jakgitel ong·ataha. “Uni gimin da·o Kristo Jisuo donggiparangna mamung matnanga dongja” (Romrangna 8:1; 5:16, 18). Ua siaoni jakgitel ong·atako man·gipako dos gri ine chanmanaha; una mikkangchiba jegale bichal ka·ani aro jringjrotna siani dongtaijawaha.
9. Rongtalataha (Bebera·gipani Papko Rongtalataha)
Ia “rongtalatani”–ara paponiko Isolna dingtangatani ong·a. Ian changsa rongtalatenba bebera·gipako jringjrotna jokatani gita apsan ong·a.
Ibrirangna 10:10: “Ua namnikao, Jisu Kristoni be·enko chansano on·anichi, an·ching rongtalatako man·aha.” Jisu Kristoko bebera∙ahaon, Jisu Kristo an∙tangni be∙en aro an·chitangko on·chakachi an·chingni paprangko rongtalatenba an·chingko Isolona rimnapaha (cf. 2 Timothyna 2:21); jechi an·ching pangnajolna (jringjrotna) Isolni mikkango rongtale tangna man·gen (cf. Ibrirangna 10:14; 9:12).
10. An·sengataha (Bebera·gipako An·sengataha)
Ia “an·sengatani”-ara gisikko an·sengatani ong·a. Ian papni sabisichi signioniko gisikni gita an·sengatako man·ani ong·a.
Isaia 53:5: “An·chingni niam pe·anirangna ua mata bu·ako man·aha, an·chingni namgija dakanirangna bnekako man∙aha, an·chingni tom·tom ong·gnini doke skiara uni kosako ong·aha; aro uni doka man·achin an·chingko an·sengataha.” 1 Pitor 2:24-o agana, “…uni matachi na·simang an·sengako man·aha.” An·chingni papni sabisio sina siaoniko an·sengatna Jisu Kristo mata-bu·ako man·e an·chitangko on·chakaha. Uni an·tangko on·chakachi an·ching bebera·gipa sakanti an·sengatako man·aha.
11. Jringjrotni Janggiko Man·aha (Bebera·gipa Jringjrotni Janggiko Man·aha)
Ia “jringjrotni janggiko man·ani”-ara jringjrotna sinasigipa mandena jringjrotni janggiko on·skae uko tangatani ong·a. Jisu Kristoko bebera·on, Jisu Kristooniko jringjrotni janggiko man·a, aro uko bebera·gipana on·kamahani gimin jringjrotnan man·kamaiaha.
Johan 5:24: “…bebera·gipan jringjrotni janggiko man·aha, aro bichal ka·aona re·baja, indiba siaoni janggiona bataha.” Aro Jisu agana, “Anga na·simangna beben agana, bebera·gipan jringjrotni janggiko man·aha” (Johan 6:47; 1 Johan 5:12a).
Isolni an·chingna on·gipa jringjrotni janggiara Uni Depante Jisuo donga (1 Johan 5:11); an·chingni Depante Jisuko bebera·ani somaion an·ching uko (jringjrotni janggiko) Uoniko man·aha (1 Johan 5:13; cf. Johan 3:16; 6:40). An·chingni man·gimin gimapilgipa ong·ja; maina an·chingni janggi gimikan Jisuni jako ong·aha (Johan 10:28).
12. Seaha (Bebera·gipako Seaha)
Ia “seani”–ara seoke ra·ani ong·a. Ia see ra·aniko Jisu Kristoan daka; mandeni kamde ku·rachake an·tangko sechina on·anisan ong·aia.
Johan 15:16: “Na·simangde angko sejachim, angasa na·simangko seaha” An·ching Jisuko seaha ong·ja, indiba Jisusa an·chingko seaha. Seoke ra·ani kamara Jisuni ong·a; an·chingde Uko bebera·e Una on·kanganisan ong·a. Ephesusrangna 1:4-o agana, “maina an·ching ka·saao uni mikkango rongtala, aro matnanga gri ong·china a·gilsak ong·chengna skangan Kristoo an·chingko seaha” (1 Pitor 2:4, 9-10; cf. 1 Thessalonikarangna 1:4; Romrangna 9:11; 11:5, 7, 28; 2 Pitor 1:10). Iano Jisu Kristoni bebera·giparangko an·tangna seoke ra·aniara Isolni mikkango matnanga gri ong·atnasa ong·aha.
13. Salgini Songnoko Napataha(Bebera·gipa Salgini Songnoko Napataha)
Ia “salgini songnoko napatani”-ara Isol an·tangni songnoko an·tangni manderangko dingtang donani ong·a.
Ephesusrangna 2:6: “aro Kristo Jisuo an·chingko un baksa chakatataha aro salgirango un baksa asongataha.” Jisu Kristoni an·chingko jokataniara, an·chingko Salgio dongatnan ong·a, aro Ua jeo donga an·chingkoba an·tang baksaan dongatnan jokataha (cf.Kolosirangna 1:13; Johan 10:27-29; 17:9, 11, 24). Uni gimin an·chingko ‘salgirango un baksa asongataha’ inani ortoara, an·ching bebera·gipa sakantikon Jisu Kristo jeo donga uanon donenga ine ong·a. Kan·dike aganode, an·ching salgio donggipa manderang ong·aha (cf. Philippirangna 3:20).
Iarangna agreba Sastroo jokataniko gipin kattarang-koba jakkale agana. Uarang:
1. Chakatata ba tangchaata (Johan 11:25; Kolosirangna 2:12-13),
2. Cholgugako napa (Johan 10:9-10),
3. Janggini chimik naa (Johan 4:13-14),
4. Janggini pitako cha·a (Johan 6:54),
5. Jisuan ramako re·a (Johan 14:6),
6. Jisuni seng·ao re·a (Johan 8:12), etc.
Ia kosako janapgiminrang baksana, bebera·giparangara Pagipa Isol, Depante Jisu aro Gisik Rongtalgipaona maidakako man·giparang ong·aha?
➧ PAGIPA ISOLNA an·ching bebera·gipa sakantian:
1. Man·rikgiparang (Watatarang 26:18; Romrangna 8:17),
2. Salgini songdongpagiparang (Kolosirangna 1:13),
3. Isolni nokkolrang (Romrangna 6:22), aro
4. Isolni kamalrang ong·aha (1 Pitor 2:9).
➧ DEPANTE JISU KRISTONA an·ching bebera·gipa sakantian:
1. Ra·chakgimin (Ephesusrangna 1:6),
2. Kristoni be·enona napgimin (1 Korinthirangna 12:13; Galatiarangna 3:27),
3. Kristomung gopako man·e chakatpila man·gimin (Romrangna 6:4; Kolosirangna 3:3),
4. Kristona on·ako man·gimin (Johan 17:9),
5. Kristoni ripengrang ong·aha (Johan 15:15),
6. Salgio bimungko seako man·aha (Luk 10:20),
7. Salgio Kristo baksa asongatako man·aha (Ephesusrangna 2:6),
8. Ka·dongani patianiko man·aha (Titusna 2:13),
9. Isol Saksanan Sakgittamo bak man·pagiprang ong·aha (1 Johan 1:3).
➧ GISIK RONGTALGIPAONA an·ching bebera·gipa sakantian:
1. Atchitaigimin ong·aha (1 Pitor 1:12; 23).
Bon·atani
Jisu Kristoko bebera·gipako jokataniara ong·chongmotaha ine an·chingna Sastroo dingdingtang bimango sakkiko on·aha. Ian jokataniko ong·aha ine u·iania, Ong·anggimin Tense-o u·iani ong·a. Iako kan·dike aganode, “Angko jokataha” ba “Anga jokaha” ine ong·a. Ia Ong·anggimin Tense-ko chagrongahaosa Ongvenggipa Tense aro Ong·gni Tense-ko chong·mot u·igen.
No comments:
Post a Comment