Ia chasongo dedrangko name dal·atna rakbegipa somai ong·a. A·gilsakni ong·enga obostarangko ma·sina cholrang sambeng ketchion dongaha, derangna agan-skie on·na ine somaiko sengengmitingon, dedrangan skang knasomanengjok aro nikmansoengjok. Unigimin ia chasongo maa paani dedrangna skie on·anirang ja·manchakna altua. Chasongni kri skie agane on·nade maa paa-rangan seng·batna nangenga. Nambatgipa bewalrangko jakkale dedrangko dal·atna nangenga. Ia a·gilsakni skie on·anirang rokom bang·oba angni namnikbatsranggipa skie on·ani cholde Isolni skie agane dongimin Sastroonin ong·a. Sastro-de chasongnaba outdated ong·ja, je chasongni manderangna meliaigipa ong·a. Mandena gisik gnanganiko on·na man·anide Isolni kattaosa aro Isolni kattachisa ong·a.
Ia ka·mao dedrangko maikai Sastroo pangchake dal·atna nanga, kan·dike talata. On·gimin Sastroni kattarangko poraio nambate ma·sina man·gen. Poraibo, na·aba changgipa maa paa ong·gen, dedrang nang·ko manigen aro kusi ong·gipa maa paa ong·na man·gen.
DEDRANGARA SAWA?
1) Isolni on·ani (A·ba. 33:5; Git. 127:3): Isol mande jatko jelatna dedrangrangko an·chingni nokdangrango atchiatenga. Nang·ni nokdangoba depante ba demechik atchiahaode, ian Isolni mangsongani kamo na·aba bakko man·paengjok ine ma·sibo. Isolni mangsonganio bakko man·on, na·a dai-ko chu·sokatna nangaoniba jokja.
2) Isoloni man·rikani (Git. 113:9; 127:3): Isol an·tangni mangsonganiko chu·sokatengon, nangomangmang bonatna sikja. Ua nang·na dedrang aro su·drangrangko patie Uni mangsonganiko donangrikrikna aro ja·chongrikrikatna ska. Isolni dedrangko pation, nang·ni nokdango Uni man·rikaniko bon·changatja aro nang·ni machongba chasongni chasongna bon·ja.
MA·A PAANI DEDRANGNA DAKCHENGNA NANGGIPA
1) Dedrangko Isolni nokona senggnangan ra·bana nanga (1 Sam. 1:24): Dedrangko patianina mitelpilan baksa uko Isolna pakwatna nanga.
2) Gitel Jisuona ra·bana nanga (Mark 10:13-16): Gitel Jisuni gimin aganskie on·na nanga aro Gitel Jisuni gimin tom·dakgipa biaprangona rimbana nanga.
DEDRANGKO DAL·ATANI BEWALRANG
1) Ka·onangatgija manenge skina nanga (Ephe. 6:4; Kol 3:21)
2) Gitelni (Isolni kattao me·sokgimin gita) skianio (Ephe. 6:4)
3) Gitelni (Isolni kattarango demesaani gimin me·sokgimin gita) demesaani (Ephe. 6:4)
4) Isolni ramao skie u·iatani (Deut. 31:12, 13; Toe Skiani. 22:6)
5) Skiachi mande dakani (Ephe. 6:4; Toe Skiani. 22:15; 29:17)
6) Simsakani: i) Ma·giparang bi·sarangna simsaka (1 Sam 1:22; 1 Raja 3:21; Git 22:9; Solomonni Ring·ani 8:1); ii) Nurserangchi me·chik bi·sako nirokna man·a (A·ba. 35:8)
DEDRANGNA MAIKO SKIGEN?
1) Isol saksanna ka·saaniko (Deut. 6:4-5; cf. Mati 22:57; Luk 10:27).
2) Noksulrangna ka·saaniko (Levi 19:18; Mati 22:37-39)
3) Isolko (Isolni kattarangko aro niamrangko) ja·rikaniko (Deut. 6:7; Re×o 10:2; Deut. 31:10-13; Git. 22:30-31; 78:5; Johan 14:21,23)
4) Isolni ka·saani aro Jisuni jokatani gimin (Johan 3:16)
DEDRANGNA MAIKAI SKIGEN?
1) Janggi tang-mesokachi (Deut. 6:6; cf. p. 7a; cf. Jeremia 31:33)
2) Agangrikachi (Deut. 6:7)
3) Skiachi (Deut. 6:7; Bichal Ka·giparang 2:10ff)
4) Seachi (Deut. 6:9): Nokni pakma ba jeoba Isolni kattarangko aro namgipa noksarngko see donachi.
5) Gisik seng·aniko ja·rikchina ka·dongatachi (Toe Skiani. 4:3-4)
6) Uamang an·tangtangarin basee janggitangna man·na gita (Toe Skiani. 22:6)
7) An·tangni janggitangao chagronggiminko skiachi (Joel 1:3)
8) Isolni okamaniko chu·sokatanina tariatachi (1 Serikani 22:7-10)
DEDRANGNA SKIENGON BANO ARO BASAKO SKIGEN?
1. Noko asongmitingo (Deut. 6:7)
2. A·palo ramao re·mitingo (Deut. 6:7)
3. Tuengmitingo (Deut. 6:7)
4. Chakatmitingo (Deut. 6:7)
Ia biap aro somaiko janapanide skie on·na nangchongmotaniko me·sokenga. Skie on·anide ia biap aro somaiosan ine ong·ja, je biap aro somaioba ong·na man·a.
DEDRANGKO SASON KA·ON MAIKAI SASON KA·GEN?
1. Betsmitko jakkale sason ka·achi (Toe Skiani. 23:13-14; 22:15)
2. Manenge skiachi (Toe Skiani. 4:1; 13:1)
3. Mikrakate skiachi (Toe Skiani. 1-5)
DEDRANGKO SASON KA·ANI MIKSONGANIRANG (Ibri. 12:4-11)
Derangko sason ka·ani miksonganiara maia?
1) Sason ka·aniko nanganiara: namgijako champengna (v. 4).
2) Sason ka·ani ortoara: kam aro kattachi skiani (v. 5).
3) Sason ka·ani miksonganiara: ka·saaniko me·sokna (vv. 6-9).
4) Sason ka·ani nisan-ara: manigipa ong·atna (v. 9).
5) Sason ka·ani biteara: dikdiksa sadikgen indiba ri·ute namgniko man·gen (vv. 10-11).
DEDRANGKO SASON KA·ANICHI MAI NAMGNIKO RA·BAA?
Bi·sarangko ong·atgipa ba dakgipa Isolan bi·sarangko gisik gnanggipa ba mande ong·atnade sason ka·anichisa man·gen ine ma·sia.
1) Bi·sako doke skiani bi·sako gisik gnanggipa ong·ata (Toe Skiani. 29:15)
2) Bi·sako doke skiani an·tangna (pagipa aro ma·gipa) kusi ong·gniko ra·baa (Toe Skiani.29:15b)
3) Bi·sako doke skiani bi·sana rongtalgipa janggi tanganiko on·chongmota (Toe Skiani. 20:30)
4) Bi·sako doke skiani an·tangna Isolna dangdike on·na cholrangko bang·ata (1 Tim.3:4,5,12; 1 Sam. 3:12-14)
5) Bi·sako sason ka·ani bi·sani bilsirangko bang·ata (Re·o. 20:12)
6) Bi·sako doke skiani bi·sana uni bilsi briahaoba kusi ong·gipa ong·ata (Toe Skiani. 22:6)
7) Bi·sako doke skiani bi·sani janggiko jokata (Toe Skiani. 23:13)
8) Bi·sako doke skiani bi·sani norokchina re·anggniko champengrika (Toe Skiani. 23:14)
9) Bi·sako doke skiani bi·sana nambatgipa skia poraianiko on·a (Toe Skiani. 29:15)
DEDRANGKO SASON KA·MITINGO GISIKO DONNA NANGANIRANG
1) Isolni sastiko nangchi me·sokenga ine bi·sa u·ichina (Git. 103:13)
2) Basakobade doke skiani parirang bi·sao donggen (Toe Skiani. 20:30; Ephe. 6:4)
3) Senggnangan bi·sako doke skina a·bachengbo (Toe Skiani.19:18), bi·sani bilsi 3 rangoni ka·sine sason ka·bo. Bilsi 5 ong·aonide on·tisa rakbate sason ka·bo.
4) Ma·a paa bi·sako doke skion melie dongna rakbea, unigimin bi·saming meligipaba ong·bo.
5) Doke skiani dakbewal ong·na nanga. Jagokatna nangja (beng·aniko dakchengesa, aganchenge dokna nanga), katta ra·jaode dokgen ine bi·sana ma·siatbo.
6) Namgija kamrangko dakani kri sastiko on·na nanga.
7) Bi·sani nangnike bi·arangko gimikanko on·na nangja, on·node dal·ahaoba bi·sa an·tangni nangnikako man·na sikbegen aro namgija dake man·naba jotton ka·aigen.
8) Bi·sako dokani name kimkimna nanga (bi·sa gisik pil·aona sokna nanga)
9) Bi·sako dokani ja·mano maina dokaha uko agane on·pilna nanga.
10) Ma·a paa sakgni melie bi·sako dokanio dakchakgrikna nanga.
11) Bi·sani nama kamrangna gisik nangbo aro uani gimin bi·sako mitelbo, namgija kamrangna mitelnabe.
12) Bi·sani jedake ong·a uko ra·chakbo, bi·sani daka kamkosa namgijakode ra·chaknabe.
13) Bi·saming chanchigrikna gisik nangbo, indiba bon·kamgipa tik ka·ani ma·a paani palsa ong·a
14) Bi·sako dokani ta·rakna aro dosni kri ong·na nanga, agrepilna nangja.
15) Niamrangko dingtangatna nanganiko nikon uko dingtangatbo.
16) Aganmangmangaigipa aro mikrakataigipa ong·nabe, sason ka·bo.
17) Niamrangko talate on·rongbo.
18) Bi·sarang dal·drobaaon, mitam niamrangko chanchigrikna nangoba bang·gijakode ma·a paani jakon rakkina nanga
19) Bi·sako uni chanchie tik ka·giminrangna dai donganiko u·iatbo.
20) Bi·sarangoniko an·tangni (pagipa aro ma·gipa) rakkina man·ana bate nambate man·gen ine ka·dongnabe.
21) Bi·sana kakket ong·aniko me·sokbo
22) Neng·nikanirangko agane pa·sikaniko uamangni mikkango agannabe (2 Serikani 10:14)
DEDRANGKO SASON KA·ANI CHU·SOKGIPA ONG·AMA ONG·JA NIPILBO
1) Dedrangara gisik gnanggipa ong·baengama? – Toe Skiani. 23:19
2) Dedrangna gisik gnanggipa basee ra·aniko on·engama? – Toe Skiani. 19:20
3) Nang·ni janggi-na neng·takani aro kusiniko on·engama? - Toe Skiani. 29:17
4) Nang·ni sason ka·anio dedrangna ka×saaniko on·engama? – Ibri. 12:6
5) Dedrangara kattako rakkigipa ong·ama? Kattako rakkigipa ong·ode, skitaitaina nangjawaha - Jer. 31:34b
NAMGIPA BEWALRANGKO BI·SAO DONGKAMATNADE
1. Mingsa bewalko bi·sao dongkamatnade ua bewalko changni chang dakataitaina nanga.
2. Bi·sako jringjring ranta ka·atrongbo.
3. Somai done jekoba dakna bi·sako skibo.
4. Ma·a paan bi·sana namgipa dakmesokani ong·bo.
5. Bi·sa namako dakna aganako dakjaenga ong·ode, uko dakatbo.
6. Skanggipa changna mangba namgijagipa kamko dakjana skibo.
7. Bi·sa gisikni tik ka·aniko nokosan ong·aigija jinmaoba dakna namgipa ong·a.
8. Namgipa bewalrango janggi tangggipa manderang baksa bakrimatbo.
Anga bebera·a, ia talatbagimin Isolni kattarangko poraiachi nang·ni chanchiani aro ma·sianirangko apalbataha. Isol an·tangan mandeko dakahani gimin mandeko maikai dal·atna nanga, an·ching maa paarangna Uni kattao see donmanaha. Ia kattarangko jakkale an·chingni dedrangko agan-skie on·na jotton ka·ode Isolni namnikaniko man·gen. An·ching name agan-skie on·na changjaoba, Isolan dakchakskagen. Ja·mano dedrangni dal·bajoko, dedrangko uamangni chonmitingo Isolni kattachi dal·atbaaniko nipile nie Isolni bebe ong·aniko nikgen. Oe Isolni katta tol·ja. Bebe ong·a.
