An·ching maidakgipa dilgipako am·a ba nangnika? Bang·a manderangan agana, an·ching Jisuni dilgipa ong·ani bewal-ko am·na nanga.
Jisuni dilgipa ong·ani bewal aro a·gilsakni dilgipa ong·ani bewal dingtanggrika. Mitam a·gilsakni dilgiparanga bilchi amako man·e bil-na mikbokgiparang ong·a.
Ka·mao, Jisuni dilgipa ong·ani bewalko ja·rikgipa dilgiparang ming (baksa) bilna mikbokgipa a·gilsakni dilgiparangni dingtanggrikaniko nisusae me·soke on·enga. Ia rokom gni dilgipani bewalrangchi mai maiko manderangna aro songsar-na ra·baa?
Bilchi Amako Man·gipa ba Bilna Mikbokgipa A·gilsakni Dilgiparang Maiko Ra·baa?
1. Sualgrike kam ka·ani dongja
2. Jongadarang saknaaniko man·a
3. Tol·mikgipa ong·baa
4. Gaora de·giparang ong·baa
5. Chinrang bang·rikrika
6. An·tangtangkosan chanchiaia
7. Katchaaniko bachiba gala
8. Kratchaani dakbewalrang
9. Mangrakatani gimaa
Jisuni Dilgipa Ong·aniko Ja·rikgipa Dilgiparang Maiko Ra·baa?
1. Gisikni gita janggi tangani namroroa
2. Kristoni be·en ((mondoliko)-ko mangrakata
3. Bebera·anio ku·mongani donga
4. Jisuko u·iani bang·a
5. Chu·sokgipa ong·na dal·roroa
6. Sakgipinrangna gisik nanga
7. Ka·saa gnang bebeko agana
8. Chong·mot ong·e chong·mot-ko ka·a
9. Dilgiparangko Dangdike on·anina taria
Ia nisusae nianio, Jisu-ni dilgipa ong·ani bewal-ko ja·rikgipa·dilgiparangan nambatgipa ong·a, jemangan pilaknan namgniko ra·baa. Na·aba Jisu-ko dilgipa ong·ani bewalko ja·rikpagenma?
Jisuni Dilgipa Ong·ani Bewalrang
Jisuni dilgipa ong·ani bewal-ara pangnan nokkol gita dakgipa bewal ong·a. Ua an·tangan Isol ong·eba an·tangko mande ong·e, manderang baksa janggi tanganio aro Paa Isolni aganako manie janggi tanganio, mande ramram gita janggi tange me·sokaha, ramram manderang baksa dongaha, ramram cha·aniko cha·aha, aro janggi tangani cholrangna Uni ma·gipa Mariam baksa noktango kamko ka·aha.
Ua an·tangan Isol ong·e, man·e cha·na aro chugipa gadango janggi tangna Uo mamungba bil amgijani ba chu·onggijani dongjachim indiba manderangko man·na ine Ua pilak kamon an·tangko onataha. Minggipinara Ua manderangnasa skie donangengani gimin manderangni dakna amakosa tangmesokachi me·sokaha. Ian manderangna maikai janggi tangna nanga aro maikai dilna nanga uko Uni dakmesokani ong·chongmotaha.
Jisu Kristoni dilgipa ong·ania maikai ong·a, Philippirangna 2:1-11-o rongtale seaha: “Uni gimin Kristoo maiba ka·dimeani ong·ode, ka·saani maiba ka·gualani ong·ode, Gisikni maiba rengsi ong·ode, maiba ka·tongo nanga aro ka·sachaka ong·ode, indide angni katchaako chu·sokatbo; chong·motan ka·sarime, gisiksan ong·e, mingsanko chanchie; susae aro gaora de·grame mamungkoba dakgija, indiba gisik sontolchi an·tangna bate gipinko nambata nike; sakanti an·tangnina miksonggija sakgipinnina miksonge, na·simang mingsanko chanchina gita. Kristo Jisuo ia je gisik gnangchim, uan na·simangoba ong·china; ua Isolni bimangko man·e, Isol baksa apsan ong·ako ra·sekani ine chanchijachim, indiba nokkolni bimangko ra·e, mande gita ong·e, ua an·tangko algriataha; aro ong·ao mande gita nikako man·e, ua siaona kingking, chong·motan chisolo siaona kingking, ge·etako ra·e an·tangko onataha. Iani gimin Isol uako chubeataha, aro pilak bimungna bate dal·bata bimungko una on·aha; maikai salgio aro a·ao aro a·ningo pilakni ja·skuan Jisuni bimungna dem·gen, aro Jisu Kristoan Gitel ine Pagipa Isolni rasongna pilak srean ku·rachakgen.”
Ia Sastroni kattarangko name poraie nion, ka·mao me·sokatenggipa dilgipani (dangdike on·gipani) bewalrang ba gunrang-ko Kristo Jisu-oniko nikgen.
1. Ua an·tangko nokkol gita ong·ata
2. Ua sakgipin-o bal-ko gatja
3. Ua dakmesokani gnang dila
4. Ua an·tangko onata
5. Ua an·tangko bi·sa gita ong·ata
6. Ua an·tangko dambebatgipao dona (sakgipinko bribatgipao dona)
7. Ua an·tangko komibatgipao dona (sakgipinko chubatgipao dona)
8. Bon·kamgipa (skang skang dakja)
9. Ua darangkoba draja
10. Ua an·tangna namgniko man·na sikgipa ong·ja
11. Ua an·tangko mingsingatna sikja
12. Ua an·tangko mande ramram gitan ong·ata
13. Ua manigipa ong·a
14. Ua siaona kingking pilak-on on·kanga
“Kristo Jisuo ia je gisik gnangchim, uan na·simangoba ong·china.” ine Philippirangna 2:5-o aganani gitade Jisu Kristoni apsan gisikko man·pachina bebera·gipa sakantina on·aha. Ia Jisuni dilgipa ong·ani bewalrangko ja·rikna ga·sue nikjanaba donga, maina Uni bewalrang ongipani bewalrangsa ong·a, indiba Uni mande jinmako salna man·ani aro manderangna namgniko on·na amako niatskaode Uni dilgipa ong·ani bewalrangko darang a·gilsakni dilgiparangba sokjawa.
Minggipinara Jisu Kristoni nisan-an manderangko jokatna aro manderangna namgniko on·nasa ong·ani gimin Uni dilgipa ong·ani nisan namen nama aro chu·sokgipaba ong·a. Ia Jisuni dilgipa ong·e kam ka·a gitan an·ching sakantini kamba ong·na nanga. Maina an·ching sakantian Jisu Kristoni nokkolrang aro Uko ja·rikgiparang ong·a. Ua jeko agana, skia aro didia, ukon an·chingde ja·rikna nangtelgipa ong·a.
Sastroo Mingsinggipa Dilgiparangoniko Skie Ra·ani
Sastroo mingsinggipa dilgiparangoni bang·batan uamangni namachi aro choliachi mingsinggipa dilgiparang ong·ja; uamang Isolna an·tangtangko choljokate on·kanganichisa Isolni jakkalako man·aha. Maina Isol chu·gimik namgipa manderangko am·ja, indiba an·tangtangko choljokate chu·gimik Una pakwatgipakosa am·a.
Isolni mingsinggipa dilgiparangko ka·mao me·sokatenga. Uamangni bilgrianirangkoba me·sokatjolenga; uamango bilgriani dongoba, uamang Isolna choljokate an·tangtangko pakwatahani gimin Isol uamangko an·tangni kamna jakkalaha.
1. Gideon (kengipa ong·achim)
2. Mose (mande so·otgipa aro ku·sik to·tagipa ong·achim)
3. Jakob (togigipa ong·achim)
4. Pitor (ga·akaigipa aro kimkimgijagipa ong·achim)
5. Daud (Til·ekgipa ong·achim)
6. Paul (Mondoliko a·rikgipa ong·achim)
7. Rahab (An·tangko pale cha·gipa ong·achim)
8. Tamar (ma·drangming ong·gija roaigipa ong·achim)
9. Abraham (tol·gipa ong·achim)
10. Sara (Isolni kattana ka·dinggipa ong·achim)
11. Ruth (Jihudi ong·ja, Moab-ni mandesachim)
12. Jisuni sninggiparang (pangnan jegriksimaigiparang ong·achim)
Isol an·tangni pal kam ka·na sako sako seoko namgen uko ma·sia, mandeo namgipa bewalrang dongjaoba, ka·tongo kakket ong·e on·kangani donggipako seoka ine ia kosako me·sokgipa dilgiparangni janggi tangani aro uamangni bewalrangoniko nie ma·sina man·a. Uamangni an·tangtangko on·kangahaon, Isol an·tangan uamangko an·tangni kamrangna tariaha aro namatroroataha ineba nikgen. Na·aba Isolna an·tangko choljokate Uni kamko ka·na on·kanggenma?
Bon·kame Aganani
Ia Jisuni dilgipa ong·ani bewal-ko an·chingni janggi tanganio ja·rika ong·ode, an·chingba bang·a manderangko Kristoona rimbana man·gen aro manderangna namgniko ra·bana man·gen, aro sakgipinrangko Jisuni dilgipa ong·ani-ko ja·rikpachina dilbana man·gen. An·ching bebera·gipa sakantian Uni daksningchina donanggipa dilgipa ong·ani bewalrangko daksningna dai dongaha.
Maikai Jisuni dilgipa ong·ani bewalrangko ja·rikna man·gen? Jajrengnabe, na·a an·tangko Gitel Jisu-na chu·gimik pakwatbo. Jisu-ko nisan donbo, Uni ska aro namnikara maia uko chanchijringbo. Ua nang·ko Uni Gisik Rongtalgipani bilchi namatgen aro nang·ko tarigen. Unon na·a Jisu-ni chanchiani aro bewalrang gita janggi tangbana a·bachenggen. Jisuni dilgipa ong·ani bewalrangko nang·o nikrorogen.
About Author
Sengban M Momin is an author who formerly worked as a pastor for 10 years. He has a passion for God's mission and love to share the Word of God. He has authored few books in his own language (Garo) including his best book Isolni Ka·saae Jokataniko Bebera·e Janggi Tangani (Living by Faith in God's Gift of Salvation ). He presently lives with his wife and a daughter in Tura, Meghalaya, India.
No comments:
Post a Comment