Aganchengani
Isolna kamko ka·anio ‘dangdike on·ani’-ara maikai ong·a? Ia sing·anina dingtang dingtang bimango aganchakna man·gen. Mingsa talataniko niatna: dangdike on·aniara “meli-nangrimani” ong·a ine Isolna kamko ka·giparangoni bangbatan agana. Ian manderangni janggi tangani baksa dangdike on·gipani janggi tangani meligipa ong·aniko miksonga. Manderangna melie kamko ka·nade dangdike on·gipaan an·tangko onatna nanga. Dangdike on·gipao onatani dongjaode manderang dangdike on·gipako ra·chakna amja aro dangdike on·gipani ba jinmani kamo chu·sokgipaba ong·ja.
Ia a·gilsako bang·a dangdike on·giparangni dingtang dingtang dakmesokani donga, indiba Jisu Kristosan mangmang darang gipinna bate nambatsranggipa aro chong·motgipa dakmesokani (model)-ko on·aha. Uni janggi tangani aro dangdike on·ani kamrangara pilak manderangna meligipa aro chu·sokgipa ong·a.
Jisu Kristoko bebera·giparangnade Jisu Kristosan mangmang dakmesokani (model) ong·a. Una agre sako ja·rikgen? Dangdike on·gipa aro dangdike on·gijagipa sakantian Jisu Kristoko bebera·gipade Uko ja·riknan nangtela (Uni ska-namnikako ba ge·etanirangko manitelna nanga).
Jisu Kristoni ia a·gilsako janggi tanganggiminko niaton, Uni pilak kamko ka·aniara dangdike on·anisa ong·a ine nikgen. Uni dangdike on·ani kamrang aro janggi tangmesokaniara Ua an·tangni dakna nangako dakangaha ba janggi tangna nanga gita janggi tangangaha indake ong·ja; bebera·gipa sakantiba Uni dakanggimin aro janggi tangmesokanggimin bewalrangko ja·rike janggi tangpachina ine miksongmanchaa.
Angni ia kan·dikgipa article-ko see nakatatna skaniba A·chik bebera·giparangba Jisu Kristochiko nie aro Uoniko skie ra·e, Uni dangdike on·ani aro janggi tangani bewalko ja·rike janggi tangna dilako man·pachina ong·a.
Talatchengani
Jisu Kristo an·tangan Isol ong·oba, a·gilsako atchie janggi tangmiting salrango Ua an·tangko Degipa dake Pagipa Isolna onatbee janggi tangaha. Uni a·gilsako daka pilakan Pagipa Isolni miksonga aro ge·etgiminrangkosa dakaha (Johan 17).
Uni atchiaoni siaona Uni onate janggi tanganiko aro dangdike on·aniko nikgen. Uni dakgimin bewal aro kamrang pilakan manderangko man·nasa ong·aha. Uni an·tangko nokkol gita onatanichi a·gilsakni bang·a manderangko Isolchina salna amaha. Minggipin, ia a·gilsako Uni an·tangko Isolni nokkol gita onatbee dangdike on·ani kamara Uko (Jisuko) ja·rikgipa sakantina Uni (Jisuni) dakmesokani ong·chongmota.
Kosako aganbagimin gita, ia article-o Jisu Kristoni Isolni kamko ka·anio dilgipa ong·oba nokkol gita an·tangko onatbee kamko ka·aniko talata. Uandake an·tangko onate kamko ka·gipasa Salgini Songnokode chong·mot dilgipa aro chu·sokgipa ong·a.
Ia article-ko poraianichi nangni chanchiani aro miksonganiko Jisu-ni janggi tangmesokako ja·rikna dilgen ine ka·donga.
Chapter 1
Nokkol Gita Dangdike On·ani Katta-ko Talatani
Ia chapter-o Jisu Kristoni an·tangko nokkol gita onatbee dangdike on·ani-ara maidakgipa katta-oni ong·baa uko talata.
Nokkol’ kattako English katta ‘servant’ oniko pe·skaa; ‘Servant’ kattako Greek kattaoniko ra·gatskaha. Greek kattarang, jekai, ‘diakonos’ jeni ortoan ‘nokkol’ ong·a (Mati 22:13; 23:11; Mark 9:35; Johan 2:5, 9; 12:26). ‘pais’ jeni ortoba ‘nokkol’ ong·a (Mati 8:13; 14:2; Luk 7:7) aro ‘oiketes’ jeni ortoba ‘nokkol’ ba ‘nokni nokkol’ ong·a (Luk 16:13).
‘Dangdike on·ani’ kattako English katta ‘serve’ oniko pe·skaa; ‘serve’ kattako Greek katta ‘diakoneo’ oniko ra·gataha, jeni ortoan ‘dangdike on·a’ ong·a (Luk 10:40; 12:37; 17:8; 22:26, 27). Greek katta ‘doulos’ ni ortoba ‘dangdike on∙ani’ ong·a.
Ia kosako ‘nokkol’ aro ‘dangdike on·ani’ kattarangni ong·baaniko niaton, nokkol gita dangdike on·ani ortoara saniba nokgipa ong·ani ning·o donge, an·tangko nokkol gita, uni (nokgipani) skanio una (nokgipana) dangdike on·ani ong·a.
Jisu an·tangko Niam Gitchamo katchinikgipa (Isaia 53:12) aro Gitelni nokkol (‘pais’) ine me·soka (Mati 12:18 aro Isaia 2:1-4). Paulni Philippirangna 2:7-o janapgipa ‘nokkol’ (‘doulos’), je kattakon mandena jakkala, ia kattao Jisuba chu·gimikan (100%) mande ong·e, mande gita nokkolni bimangko ra·e dangdike on·aniko me·soka.
Chong·motko niatode, Jisude an·tangan Isol ong·e, Ua darangniba nokkol ong·jachim, Ua jakgitele donga, aro Ua Gitel ong·en dongkama (cf. Mati 10:24; Johan 15:20), indiba Ua ia a·gilsako dongmitingo an·tangko sakgipinrangna dangdike on·gipa ong·e (diakoneo) dongaha. Uni mande gita nokkol ong·e dangdike on·aniko manderangba ja·rikpachina ine Ua dakmesokangaha (Philippirangna 2:5).
Chapter 2
Jisuni Janggi Tanganio Nokkol Gita Onatani
Jisu Kristoni ia a∙gilsako janggi tanganio an∙tangko onatani pilakni gitan ong∙a. Uni atchiaoni siaona kingking Ua an∙tangko dal∙e chue ra∙jaha, indiba Ua mande ramram gita onatbee janggi tangmesokaha.
1. Uni Mande Pil·e Atchianio Onatani
Ua namen ramram nokdangni ongipa obostao re∙baaha. ‘Ua chonbegipa song Bethlehem-o onbegipa nokdang ge·sani matchuni nolosa atchiaha. Uni atchiani obostaan Uni an∙tangko onatbee ia a∙gilsakona re∙baaniko me∙soka’. Uni a∙gilsakni pagipa carpenter (bolni mistry) ong∙achim.
Jisu ia a·gilsako onbegipa nokdango kangal ong∙e re∙baaha. Ian Isolni an∙tangko onatbee, ramram ong∙e, sontol ong∙e an∙tangni dakgimin manderangona re∙baaniko me·soka.
2. Uni Bi·samitingo Onatani
Luk 2:40-o agana, Ua nokdango janggi tanganiara on∙gipa ong∙a. Ua chongipa song Nazareth-o bilni asongchakanioni (Raja ong∙anioni) chel∙ao dalatako man∙aha. Ua mande ramram gita janggi tangaha, aro Isolni aro pilak mandeni ka∙sao (ra∙chakao) dal∙roroaha (Luk 2:52).
3. Uni Chadambemitingo Onatani
Jisu carpenter-ni (bol mistry-ni) degipa ong·e, uni bilsi dambe ong∙mitingon uni pagipa siaha; ua nokdango dal∙batgipa ong∙e nokdangni badingchiwalaniko dake uni jonggiparang aro nogiparangko alduna nangaha. Jisuo chugipa skie ra∙ani dongpaja. Ua uni pagipa gita carpenter ong∙e neng∙skime bilsi 30-na janggi tangna nangaha.
4. Jisuni Mande Ong∙e Onatani
Synoptic Gospel (Mati, Mark aro Luk-ni Nama Katta)-o Jisuni mande chong∙mot ong∙e janggi tanganiko me∙soka. Ua Jihudi mande ong∙e Palestan a∙songo gipinrang gita janggi tangaha. Mati aro Lukni nama kattao Jisuni ramram nokdango atchie, nokdangni manderangoni ong∙pae janggi tanganiko me∙soka (cf. Luk 2:51; 2:40, 52). Uni an∙sengatgipa aro skiako man∙gipa manderang pilakan apsan songsar aro sorkarini obostarangko chagrongpagiparangan ong∙achim. Ua manderangni noko mi cha∙aha, natok rim∙giparangni ringrango dongpaha, kajinarangko gampaaha, etc. Uni mande ong∙e janggi tangani pilakko niaton, “Ua katta be∙en pil∙aha” (Johan 1:14) ine Johan-ni agangipara Jisuni mande chong∙mot ong∙e mande gita janggi tanganiko miksonga.
Jisuni janggi tanganio ongipa gadangko basee ra∙anichi pilak gadangni, kangal cholgri ba skia man∙a ba man∙gija je mandemingba dongrimna man∙aha aro pilakni ra∙chakako man∙aha.
Chapter 3
Jisuni Kamo Nokkol Gita Onatani
Jisuna ku·pakgimin kamko niatode, Ua Raja, Messiah, Katchinikgipa, Skigipa aro Kamal dal·gipa ong·achim, indiba ia pilakon Ua an·tangko bil gnanggipa gita ra·jaha; nokkolni bimangkosa ra·e kamko ka·aha.
1. Jisu RAJA Ong∙anio Nokkol Gita Onatani
Jihudirangni nikaode Jisuara raja ong∙na krapajachim. Uamangnade Jisu raja ong·bebeode Romanrangni sasonko ra∙galna nangachim; indiba Jisu uko dakjaha; aro Ua uamangni nichaksogipa a∙gilsakni songnokko rikjaha. Ua uamangni nangnika gita an∙tangko raja dake me∙sokjaha. Jeremia 23:5 (Mati 2:6; 2:2) aro Isaia 11:1 (Mati 2:23), Mika 5:2 (Mati 2:6)-o to nonga man∙gnigipa Israilni raja, jean Daud-ni ma·chongoni bon∙kamgipa raja Jihudirangna atchigen ine agansoa gitan, Jisu to nongako man∙gipa raja ong∙achim indiba Jisuara nokkol gita dangdike on∙gipasa ong∙ani gimin Jihudirangnade Ua raja ong∙na krajaha.
Indioba Uni onatani a·selan pilak mandean Uni raja ong·aniko ra·chakna man·aha; kangal mes nirikgiparangba uni atchiani salo uko gronge olakina pa·sokaha.
Jisuni raja ong∙ani chong∙motde nokkol ong∙aniko uni sninggiparangna dakmesokanisa ong∙skaha.
2. Jisu MESSIAH Ong∙anio Nokkol Gita Onatani
“Messiah” kattara Ibri katta ong∙a, jeni ortoan “to nonggimin” ong∙a. Greek kattao “Kristos”, English kattao “Christ” aro A∙chik kattao “Kristo” ong∙a. Niam Gitcham-o, katchinikgiparangni kitaprango, Kristoni re∙bagnini gimin agansoenba Isol an∙tangni manderangna ka∙donganiko on∙aha (cf. Isaia 26-29; 40ff; Ezekiel 40-48; Daniel 12:1ff; Joel 2:28-3:21). Niam Gital-o (Nama Katta king bri-o) Niam Gitcham-ni katchinike agansogipa Kristo a·gilsakona re·baaha (cf. Mati 2:3-5; Luk 3:15; Johan 4:29ff; 7:26ff) ine sakiko on∙aha.
Isaia 40-55-o Kristoara nokkol gita kamko ka·gipasa ong·a ine rongtale me∙soka (cf. 42:1-4; 49:1-6; 50:4-9; 52:13-53:12). Ua nokkolara Isolni to nonggimin ong∙a (cf. 42:1), uni kamara raja ong∙e bichal ka∙ani ong∙a (cf. 42:1, 3-4), aro ua katchinikgipani chinko me∙soka (cf. 49:1-2; 50:4). Ua nokkol chu∙gimik manigipa ong∙e, duk chakgipa ong∙a, aro ua Kristoni bimungko gale (cf. Johan 12:13; 18:33; Mati 12:23) nokkolni bimung aro bimangko ra∙na namnikbata.
Jisu an∙tangko Kristo ine parakgija, nokkol gita onate an∙tangni ia a∙gilsako ka∙na nanga kamko ka∙na namnikbata (jekai: Uni napolanio - Mark 1:11, Uni dangdike on∙ani a∙bachengao – Mark 1:25; 3:11, Kaesarea Philippi-o Pitor-na – Mark 8:27-33, sninggiparangna – Mark 9:31ff; 10:53, Uni rasong chae napani somaio – Mark 11:1-10), aro kamal dal∙gipani mikkango - Mark 14:61-62).
3. Jisu KATCHINIKGIPA Ong∙anio Nokkol Gita Onatani
Jisu Katchinikgipa ong∙a indiba Ua Isolni nokkol ong∙a. Jisu katchinikgiparangoni dal∙batsranggipa ong∙a indiba Ua Isolni gimin an∙tangko onate janggi tangachi aro mande ong∙ao manderangna parape∙aha (Johan 1:4-18).
4. Jisu SKIGIPA Ong∙anio Nokkol Gita Onatani
Markni sea nama katao Jisu-ko “skigipa” ine agana (cf. Mark 4:38; 9:38), aro Johan Uko Isolni watatgipa skigipa ine agana (Johan 3:2; 7:16-17). Jisu Pagipa Isoloni watatgipa ong∙oba Ua Pagipa Isolni skani aro kattako manigipa ong∙a (Johan 7:17), Ua kena gnang kosakoni bebeko manderangna skiaha aro parakaha (Johan 8:28). Niam Gital-o Jisuko rongtala, kakketgipa, bebegipa, chong∙mot, manigipa, sontol, ka∙tongo on∙gipa, ka∙sachakgipa, chakchikgipa, saknaaniko chakgipa, ka∙saninggipa, aro kema ka∙gipa ine agana, jerangan nokkolni dakbewal ong∙a. Uni skiani kattarangan Uni nokkol gita Pagipa Isolni ge∙eta kam aro kattakosa ka∙aigipa ine me∙soka.
5. Jisu KAMAL Ong∙anio Nokkol Gita Onatani
Jisu Kamal dal∙gipa ong∙e kamalni kam, boli on∙anirang aro bi∙chakanirangko chu∙sokataha. Ua nokkol kamal gita Isol aro mandena agantimgipa gita kamko ka∙aha. Uni kamal ong∙e kam ka∙ani jringjrotnan ong∙kama.
Kamalrangde manderangna dangdike on∙gipa ong∙a, apsan dake Jisuba nokkol gita kamalni kamko ka∙aha.
Jisuni pilak kamo nokkol gita onate dangdike on∙anichi Isolni songnoko dangdike on∙aniara indakesa dangdike on∙na nanga ine chong∙mot dakbewalko me∙soka. Bebera∙gipa sakantiba ia a∙gilsako pamongrang, katchinikgiparang, skigiparang, kamalrang gita kamko ka∙engon, nokkol ong∙ani bewal-ko gualna nangjawa.
Chapter 4
Jisuni Dangdike On·anio Nokkol Gita Onatani Rokomrang
Jisuni dangdike on∙ani bewalrangko niatode, Ua Isol ong∙e pilak rasong mikkim aro bil-ko man∙gipa ong∙achim indiba Ua pilakkon an∙tango me∙sokgija, an∙tangko onatbee nokkol gita ong∙ani bewalko ra∙aha.
1. Uni Dal∙gipa Ong∙anio Onatani
Ia a∙gilsakni manderangnade dal∙gipa ong∙aniara gipinrangni kosako bil man∙gipa ong∙ani ong∙a, indiba Salgini Songnoko dal∙gipa ong∙anide an∙tangko onate sakgipinrangna kam ka∙anichisa dal∙gipa ong∙a ine Jisu aganaha (Mark 10:38-42). Jisu agana, “… dal∙gipa ong∙na sikgipa pilakni nokkol ong∙na nanga.” Salgini songnoko dal∙gipa ong∙aniara nokkol dangdike ong∙gipasa ong∙a (2 Korinthirangna 4:5).
Jean dal∙gipa ong∙na sikenga, ua sakgipinrangna dangdike on∙achi dal∙gipa ong∙na ong∙ja, indiba sakgipinrangna dangdike on∙anio dal∙gipa ong∙anisa ong∙a; aro jean mongsonggipa ong∙na sikenga, ua skanggipa ong∙ana bate sakgipinrangna dangdike on∙anio ong∙china. Jisu onatani gimin skiaha, “jean an∙tangko onata, uan chuatako man∙gen.” Jisu skang skang dakgipa ong∙gija bon∙kamgipa ong∙e janggi tangna skiaha.
2. Uni Bilo Onatani
Jisuni bilni gimin Ua tale aganjaoba (Mark 11:27-33), Isoloni ong∙baa ine me∙soka. Uni an∙tangko Isolni Depante ine aganachi uni bil gnanganiko me∙soka, indiba ua an∙tangko bil gnanggipa ine agansimgipa ong∙jachim.
3. Uni Kamni Gadango (position) Onatani
Jen somaio Zebedee-ni an∙tang degiparangna songnoko Jisuni sason ka∙ani somaio namgipa gadangni kamo donatchina mol∙molon, (Mati 20:26; Mark 10:43), jean na∙simangni gisepo dal∙gipa ong∙na sika, ua pilakni nokkol ong∙china ine Jisu uamangna onatani aro an∙tangko jechina skiaha.
Kapernaum-o Jisu sninggiparangna onatani gimin nambate skiaha. Ua uamangko pilakna ja∙man aro pilakna dangdike on∙gipa ong∙china aganaha (Mark 9:35). Bi∙sa gita an∙tangko ong∙ate onatanisa chong∙mot dal∙gipa ong∙ani ong∙a ine Ua aganaha (Mark 10:13-16, cf. Mati 18:4, 3; 23:12; Luk 14:11; 18:14; Luk 10:41; 9:35; Isaia 53:12).
4. Uni Rasongo Onatani
Jisu rasong mikkimko gale ia a∙gilsakona re∙baaha. Ua an∙tangan Isol ong∙e pilak rasong mikkim mingnamaniko man∙gipa ong∙oba ia a∙gilsako mamung rasongko nangnikjaha (Johan 5:41; 6:15).
5. Uni Kangal Ong·e (gamo) Onatani
Jisu man∙e cha∙gipani gadango janggi tangjaha. Ua kangalbegipa nokdango ramram manderang gitan janggi tangaha (Luk 9:58; 2 Korinthirangna 8:9). Ua gamna mikbokja, indiba Salgio gam chimonggipa ong∙ska.
6. Jisuni Dangdike On·anio Onatani
Jisu middle class background-oni ong·a. Ua aro Uni sninggiparangni dangdike on∙miting sal somairango, uamang on∙gilgiparang aro sokachakgiparangchi uamangni dangdike on∙anio janggi tangaha (cf. Mati 10:8-11; Luk 8:3; 10:38-42). Ua uni sninggiparangko pilak nanganirangna Isolo pangchakchina skiaha (Mati 6:24-34) aro sninggipa ong∙gipade uni pilak gnangrangko watna nanggen ineba skiaha (Mark 10:17-22). Uamangni nangchongmotgiparangnasan koros ka·na uamangni tangka chu∙ongaiachim (Johan 12:6; 13:29).
7. Jisuni Sakgipinna Kam Ka∙anio Onatani
Jisu ka∙sachakbeanio manderangni nangnikanina kam ka∙na gisik nanggipa aro gipinrangna dakchakanio bimchipgipa ong∙a (cf. Mati 9, 36 & 11, 28-30). Uni ka∙sachakbee manderangna dakchakania Uni ka∙saani kamko paraka (Luk 10:37; Mati 25:31-46; Luk 16:19-31).
Jisuni sninggiparangni ja∙arangko ja∙suatanio Uni onate ka∙saaniko me∙soka. Iako dakachi Ua an∙tangni onate kam ka∙anikosan me∙soka ong∙ja; indiba sninggiparangko skianiba ong∙aha. Ua uamangko onatani aro chuatani apsan re∙dima ine skiaha.
Jean gitel aro master (skigipa) ong∙na skenga, ua sakgipinrangna an∙tangko onate kamko ka∙na sikgipa ong∙na nanga (Johan 13:15). Jisuni dakgimin kamara uni sninggiparangna dakmesokani ong∙aha. Onate kam ka∙e chu∙sokatgiparang nokkolrangsa ong∙bata, uandake dangdike on∙giparangde (pod. 14) pilak kamo, sikanio an∙tangnasa dakaigija, onatani gnang sakgipinrangna kamko ka∙na nanga.
Onatani gisikara Jisunade dal∙begipa aro nangchongmotgipa ong∙a. Ua uani gimin sninggiparangko aganronga aro gaora de∙aniko galchinaba aganaha. Chong∙mot onataniara bebera∙gipani gital janggi tanganio nambatgipa ka∙sae dakgipa kam ong∙a.
Jisu nokkol-ni gadangko baseaha; jean ua somairango onbatgipa gadang ong∙achim.
Ua kakket kam ka∙anina, chong∙mot manderangni jakgitelanina, jongada nangrimanina aro tom∙tomanina gisik nangtee songsalo janggi tanganina an∙tangko onate kam ka∙aha.
Chapter 5
Jisuni Dangdke On·anio Nokkol Gita Onatani Gunrang
Jisu ia a∙gilsako janggi tanga gimikan Pagipa Isol-ko mande ra∙a aro bamao janggi tange dangdike on∙aha. Uni dangdike on∙ani-o nambatsranggipa gunara onatanian ong∙a. Jechin bang∙a manderangko salna man∙aha.
1. Uni Pagipa Isolko Maniani
Jisu Pagipa Isolko manigipa ong∙a. Ua Isolni gunrangko jakgitele jakkalaniko watgale mandeni gunrangko ra∙skaha. Ua Pagipani skanina chu∙gimik an∙tangko pakwate Pagipani skaniko dakaha (cf. Gitrang 40:8; Isaia 11:5; Luk 2:49; Johan 4:37; 5:30;8:29, 46, 55; 9:4; 14:31; Ibrirangna 10:7); aro siaona king king Ua Pagipako maniaha (Philippirangna 2:6ff; Mati 3:15; Johan 15:20; Ibrirangna 5:8). Uasan ong×aija, Ua uni a∙gilsakni ma∙a paa-koba maniaha (Luk 2:51).
2. Uni Pagipa Isolo Pangchakani
Jisuni Pagipa baksa nangrimaniara namen dingtangtegipa ong∙a (cf. Hosea 11:1; Deuterenomy 32:6). Markni sea Nama Kattao Jisuni Pagipako “Abba Apa” (Mark 14:36) ine agangipara Jisu aro Pagipa Isolni namemanchaan nangrimaniko me∙soka (Mark 12:1-12; 11:27; 14:61; Luk 3:22; Mark 9:7; Mati 16:16).
Johan 5:19-o dangdike on∙ani kam aro pilakni bidingo Jisuni Pagipao pangchakani gimin agangipara Uni nokkol ong∙ani chong∙motko me∙soka. Ua ske an∙tangko Pagipana dangdike on∙na on∙kangaha (cf. Johan 5:19-20; 10:14-55). Jisu ka∙sachake aro manigipa nokkol gita gipinrangni be∙en aro gisikni nangnikanirangna kam ka∙aha.
3. Uni Saknaani
Jisu chisolo sichakna boli gita on∙chakania onatbeani kam ong∙a. Uni duk chakna aro sichakna nangchongmotania Uni mongsonggipa skiani ong∙a (Mark 9:31; 10:33ff; cf. Mark 9:12; 10:38, 45; 12:6-8; 14:8; Mati 26:54; Luk 9:31; 12:50; 13:13ff; 17:25; 22:37; Johan 10:11-15; 12:23-25, etc.).
Duk chakani aro sichakani miksonganiko Isaia 53-o agana, nokkolni kamara uni manderangni paprangna, uamangni pal sichakani ong∙a, jechi uamangko toromirang ine changen. Iani giminan Jisu an∙tangko bang∙ani pal piokani ine on∙aha (Mark 10:45), aro bang∙ani paprangko kema ka∙na Uni an∙chiko rugalaha (Mati 26:28; 20;26-28; Johan 3:16).
Isaia 40-55 Messiah-ni nokkol ong∙ani gimin ring∙ani git ong∙a. Ua mande gipinrangna tanggipa ong∙a. Skanggipao, Isaia 42:1-9-o nokkolni sontol ong∙ani gimin sea. Gnigipa aro gittamgipao, Isaia 49:1-13 aro 50:4-9-o ua gisik aro be∙eno an∙tangko on∙kangna mangsonganiko sea. Gittamgipa git-o, Isaia 52:13-53:12-o Uni duk saknaaniara dam-sa ong∙a; jean Uni saknaaniko chakna nanganiko me·soka. Ia pilak saknaanioba Ua sontolgipa mes gita, Ua manigipa ong∙a, aro an∙tangko on∙kange algriataha.
4. Uni Dukchakani
Jisu an∙tangni dukchakna nanggnini gimin u∙ia (cf. Mark 8:31; 9:31; 10:33), aro dukchakanichi uni manderangko piokgen ine Ua u∙ia. Uni dukchakani gimin minggitam dake talatenga. Skanggipa, Jisu an∙tangni dukchakaniko “napolani” dake nika (Mark 10:38; Luk 12:49). Dukchakaniko napolani ine nikaniara Uni saknae (cf. Gitrang 42:7; Isaia 43:2) sichakanikosa miksonga. Gnigipa, Jisu uni dukchakaniko “ringchakani” ine agana jekon Isol una (Mark 10:38) Gethsemane bario on∙aha (Mark 14:36). Ia saknaaniara Isolni dongiminan ong∙a. Gittamgipa, Jisu manderangko jokatna (Mark 10:45) aro “an·tang janggiko piokani ine on·na (Luk 22:27) re·baaha ine an·tangko ra·a. Unigimin “dangdike on·na” inani ortoara Jisunade nokkolni kamko chu·sokatani ong·a.
5. Uni Sichakani
Kristoni sichakani dongjaode papna boli, jokatani, chakatpilani, aro pilak Kristianni bebera·anirang dongjawachim. Nama Katta king bri aro chittirango Jisuni sichakani gimin chong·motgipa sakiko on·a (cf. Mati 27:32-66; Mark 15:21-47; Luk 23:26-56; Johan 19:16-42; Romrangna 5:6; 1 Korinthirangna 15:3; 2 Korinthirangna 5:15; Parape·a 5:9). Chisolsako piokani kamko ka·aniara Jisuni pilak skiani aro janggi tangani bon·chotgipa ong·a.
Jisuni nokkol ong∙e kam ka·ani aro Uni sichakaniosa bon·chotea. Ua Isaia katchinikgipani agansogipako (dukchakani, jegalako man·ani, aro siani) u·ien an·tangba jegalako man·gen ine agana (Mark 8:31; Luk 17:25). Ua Isaia 53-o segiminko an·tangni janggiko on·chake chu·sokataha (Johan 10:11, 15, 17).
Jisu Uni manderangna chu·sokatani kam gimikko dangdike on·ani kam ine ra·a; je dangdike on·ani kaman pilakni jokanina sichakanio ong·a (Mark 10:54; Ephesusrangna 5:25; Galatiarangna 2:20; 1 Johan 3:16).
Manderangni balrangko chong·motan uamangni dosirangko ra·angna Jisu Saknagipa Nokkol ong·na nangaha (Isaia-ni agangimin gita). Uni saknaani, dukchakani, aro siani-ara an·tangko onatani ba algriataniko miksonga. Uni onataniara an∙tangko papirang baksa apsan chanpae papirangni bimango an·tangko boli on·chakanisa ong·a.
Chapter 6
Jisuni Nokkol Dakmesokaniara Da∙alni Dangdike On∙giparangnaba ong·a
Jisu Isol aro Jokatgipa/Kristo/Messiah ong·oba ua ia a·gilsakona nokkol ong·e re·baha. Ua Niam Gitchamo agansogimin pilakko chu·sokataha, indiba sontol nokkol gita dangdike on·ani kamko ka·e, pilak saknaani, dukchakani, jegalako man·ani, aro sianiko chakchikaha. Ia pilakkon manderangni namgnina aro joka man·gnina ua chu·sokataha.
Ua ia dakmesokaniko bebera∙gipa aro dangdike on∙gipa sakantina on∙aha. Ua jedake ka∙sachakgipa aro manigipa nokkol gita manderangni be·enni aro gisikni nanganina dangdike on·ani kamko ka∙aha, apsan dake ka·angchina, Ua an∙tangko bebera∙gipa aro Una dangdike on·gipa sakantiko ge∙etaha (cf. Johan 13:15; Mati 28:20).
> Jisuni nokkol gita dangdike on·ani kamara dakmesokanisa ong·ode, da·alo na·aba Uni dakmesoke donanggiminko ja·rikpana an·tangko on·kangpagnokma?
Appendix
Jisuni Dangdike On·anio Onatani Bewalrang
An·chingni Gitel Jisu Kristo an·tangni gisik-ko onate Uni ia a·gilsako dangdike on·ani kamrangko ka·achi dangdike on·giparangde indakesa ong·na nanga ine demesokaniko on·aha. Philippirangna 2:1-8-ko name poraie nion, ka·mao me·sokatenggipa dilgipani (dangdike on·gipani) bewalrang ba gunrang-ko Kristo Jisu-oniko nikgen.
1. Ua an·tangko nokkol gita ong·ata
2. Ua sakgipin-o bal-ko gatja
3. Ua dakmesokani gnang dila
4. Ua an·tangko onata
5. Ua an·tangko bi·sa gita ong·ata
6. Ua an·tangko dambebatgipao dona (sakgipinko chubatao dona)
7. Ua an·tangko bon·kamgipao dona (skang skang dakja)
8. Ua darangkoba draja
9. Ua an·tangna namgniko man·na sikgipa ong·ja
10. Ua an·tangko mingsingatna sikja
11. Ua an·tangko mande ramram gitan ong·ata
12. Ua manigipa ong·a
13. Ua siaona kingking pilak-on on·kanga
“Kristo Jisuo ia je gisik gnangchim, uan na·simangoba ong·china.” ine pod 5-o aganani gitade Jisu Kristoni apsan gisikko man·pachina bebera·gipa sakantina on·aha.
Unigimin bebera·gipa sakantian Uni daksningchina donanggipa bewalrangko daksningna amani bil donga (Gisik Rongtalgipani bilchi dakna ama) aro uarangko pa·sikani donggija ja·rikna nangtela (Bebera·gipa sakantian Jisuni jako aro Uni sason-ni ning·o nokkolrang ong·ahani gimin pasikna chol dongjaha).
No comments:
Post a Comment