Bang·bata manderangan, bebera·chengani somaio jajaaniko man·ronga. Pap ka·oara mai ong·gensai? Aiao, angade pap ka·manaha, angni janggide gimapilgnokma? Ian mandena jajaani ong·chongmota.
Maini gimin jokgimin mandeba pap ka·a? Name chanchiode pap-ara niamko pe·achisan pap ka·a ong·ja, ‘namako dakna u·ie uko dakgijagipaan pap ong·a’ (Jakob 4:17; 1 Johan 5:17; 3:4) ine Sastroo agana. Isolni namako dakchina agangipako dakjajokon pap ong·a. Indaken, jokgimin mandeba, uni ma·sisokgijao aro ka·na amsokgijao, Isolni kattako manina amgijachin pap ka·aona sokaia. Maina, bebera·gipani (jokgimin mandeni) gisikni chanchiani aro cholon bewalrang uni bebera·ani somaionin chu·soksranggipade ong·ja (1 Johan 1:8-10). Bebera·gipa sakantion, bilgrigipa cholon bewalrang (temperament) donga. Isolni katta aro kamo Gisik Rongtalgipani dilanio bebera·gipani janggi tangroroachisa uni gisikni chanchiani aro cholon bewalrang namrikrikatako man·a.
Ia article-o bebera·gipani bilgrianina Isolni ka·sachakani gimin talatgen.
i) Bebera·gipaba Basakobade Papo Ga·akaia Indiba Ua Gisik Pil·e Kristona Janggi Tanganiko Dontongja
Bebera·gipaoba gisik aro be·en-ni bilgrianirang dongkuaia. Indaken ua basakobade papo (Papara maia? Ia Sastrorango talata: Jakob 4:17; 1 Johan 5:17; 3:4) ga·akaia (1 Johan 1:8, 10; 2:1), indiba ga·ake dongkamgipa ong·ja (1 Johan-ni chittiko bebera·giparangnan seaha (1 Johan 5:13); iano bebera·giparangba basakobade papo ga·akaia (1 Johan 1:8; 2: 1, 10), indiba papko ranta ka·ronggipade ong·taija ine me·soka (1 Johan 3:6, 9; 5:18; 2:1). Diksiksana ga·akgen indiba ua gisik pil·e, Kristoni ka·sachakanio janggi tanga (1 Johan 1:9; 2:1).
Niam Gitcham Sastroo, Abrahamoba bilgrianirang donga (A·bachenga 20-21). Ua bebera·ani pagipa ine mingako man·pilgipa ong·oba, Isolo ka·dongjae basako tol·aha indiba ua bebera·ani pagipa aro jatrangni patiani ja·pang dake donako man·aoni galako man·jaha.
Lot jokatako man·gimin ong·eba papko ka·aha indiba ua toromni ine chanako man·kuaia (2 Pitor 2:7, 9).
Daud raja-oba bilgrianirang donga, jedake: til·ekani, mande so·otani, etc.(2 Samuel 11, 12); indiba uko Isol an·tangni namnikbatsranggipa mande ong·aoniko galjaha.
Ia Isolni dal·dalgipa manderangba mandesan ong·e, jajaani, kenani aro dakmajoaniko chagrongaha. Indiba uamangni Isolni manderang chong·mot (Isolni jokatgimin) ong·aniko uamangni gisik pil·achi sakkiko on·aha. Uamang gisik pil·gija dongna man·jaha, maina Isolni jako ong·gimin manderang ong·aha. Uamang Isolni ka·sachakanikoba man·en janggi tangangkuaha. Uni ortode ua Isolni jokatgimin manderang mamung saloba gimapiljaha.
Niam Gital Sastroo, Jisuni sninggipa Pitor-oba bilgrianirang donga. Ua Jisu Kristoko jechakaha( Mati 26:34-35; Luk 22:31-32: Ua Jisu Kristoko jechakoba, ua manderangna kenesa jechakaia, Jisu Kristoni Jokatgipa aro Gitel ong·anikode jechakja); indiba ua jokataniko gimaatpiljaha. Ua Gitel Jisu-ni mikkango bang·a gualanirangko ka·aha. Indiba ua an·tangni gualaniko dakon, namen duk ong·aha aro ua gisik pil·e Jisu Kristona on·kange kamko ka·angaha (Johan 21; Watatarang 1ff.).
Watata Paul Korinthianrangko ‘a·gilsaknirang’ ine man·enga (1 Korinthirangna 3:13) indiba uamangko ‘rongtalgiparang’ ine chananiko galja (1 Korinthirangna 1:2).
Kosako janapbagimin gita, bebera·gipaoba bilgrianirangde dongaia; indiba ua gisik pil·e Kristoni ka·sachakanio janggi tanganiko dontongja.
ii) Bebera·gipani Papo Ga·akon, Ua Sasono Donako Man·a
Bebera·gipara Isolni de changimin ong·aha aro uni janggiba Isolnin ong·aha. Isol an·tangni de changiminna ka·saa, indiba detangni papo ga·akon (katta ra·gija niamko pe·on), Isol uko doke skia ba sason ka·a. Ibrirangna 12:6-o agana, “Maina jena Gitel ka·sara uko doke skia, aro ua uni ra·chakgimin pilak depanteko doka.” Isol detangko doke skitela. “Na·simang doke skiana chakchika; depanterangna gita Isol na·simangna daka; maina badia depanteko pagipa doke skija? Indiba na·simang doke skia gri ong·ode, jeko pilakan bak man·pagipa ong·a, depante ong·ja” (Ibrirangna 12:7-8). Isol deburungkode doke skija, indiba Ua depantekosa doke skia ine iano tala.
Doke skianiko man·miting somaiode dukko man·gen (Isolni sasti on·ako man·engani gimin aro an·tangni ka·gimin papna dukko man·gen), indiba ja·mano una tom·tomani donga (Ibrirangna 12:11). Isolni detangko sason ka·anian namatnasa ong·a. Gisik Rongtalgipa uko gisik pil·na didigen, ua gisik pil·telgen aro Isolni namatako man·gen.
Doke skiani rokomrang, Daud-ni tilekachi pap ka·on, uni degipa siaha. Mitam be·en saa bilonga. Mitam kamoni ra·ongalako man·a, mitam maiba kamo chu·sokja, mitamrang jinma baksa bakko ra·na man·ja. Ia pilak doke skianiko man·on bebera·gipani ka·tong duk ong·gen, aro papni a·sel Isoni ku·rachakaniko man·roroaoni komigen.
iii) Bebera·gipade Gisik Pil·e Namroroa
Bebera·gipade papko ranta ka·ja ba papo dongkamja (1 Johan 3:6-o agangipa, “pap ka·ja” ingipara Greek Sastroode ‘papko ranta ka·ja ba papo dongkamja’ inesa sea. English kattao iako ‘does not have the habit of doing sin’, or ‘does not make sinning the habit of his life,’ or ‘does not live for the purpose of sinning’ ine ong·a); chong·motan maibakae basakoba papo ga·akoba (1 Johan 1:8, 10; 2:1) ua paponi an∙pila ba gisik pil·a (1 Johan 1:7-9; 2:1; F. W. Harding, Baptist Manual…, No. 101-ni jak 86-o agana, “Kristoni mondolia Kristoo bebera·gipa gisik pil·gipa papirangni noktang ong·a”) aro Kristoni ka·sachakanio Gisik Rongtalgipani dilaniko man·e uni gisik aro kamrang nitogipa ong·baa. Bebera·gipa pap ka·ja indake ong·ja, indiba ua pap-o dongkamja. Ua gisik pil·tela. Jedake branggipa depante, ua an·tangan gisik pil·e pagipaona re·bapila, ua gitan bebera·gipani kam ong·a. Unigimin 2 Timothyna 2:19-o agana, “An·tangnirangko Gitel u·ia, aro Gitelni bimungko minggipa sakanti toromi ong∙gijanioni chel∙china.” Bebera·gipade toromi ong·gija ba namgija kamrangoni gelroroe janggi tanga.
iv) Bebera·gipade Bebe Ong·jringjaoba, Bebera·anio Dongkama aro Jokatanikoba Man·kama
“An·ching bebegijagipa ong·oba, ua (Isol) bebegipa ong·e donga, maina ua (Isol) an·tangko jechakna amja” (2 Timothyna 2:13; 2 Timothyna 1:12; 4:18; Titusna 1:2). Bebera·gipa uni kamo pangnande bebe ong·jaoba (Isolni kattao chu·soke janggi tangna man·pajaoba), uni bebera·aode (Gitel Jisu Kristo baksa ong·anio) pangnan dongkama; apsandake uni jokatako man·aniba dongkama. Isolni kamchiko niatoba, Ua an·chingna jringjrotni janggiko on·aha aro an·ching Unin ong·manaha; an·chingni kamrang tik ong·jaoba Ua an·chingna on·gimin jringjrotni janggiko ra·pilja. Ua an·chingna indin ku·rachake ja·mano uko pe·galpilgipa ong·ja.
2 Timothyna 4:18: “Gitel angko pilak namgija kamoniko jokatgen, aro uni salgini songnokona angko jokatgen.” Watata Paul uni gisiko Gitel Jisuni unbaksa ong·aniko namen ma·sia aro pilak obostao Gitel Jisuan una chadengchakgipa ong·a ineba u·ia. Mikkangchiba pilak majoanirangoniko aro bobilrangoniko Gitel Jisuan jokatgen ine ua ka·donga (2 Kor. 1:8-10). Gitel Jisu uko salgiona soke jokatgen ineba ua ka·donga. Watata Paul-ni kattaoniko an·ching skie ra·na ma·na, je, janggi jokgiminde mamung dakeba tong·sao gimagipa ong·ja; da·o aro jringjrotnan ong·kamaha. A·gilsako dongenga dipete, majoanirang aro bobilrangko chagrongtelgen, indiba bebera·gipade je obostaoba cheaigen.
Bon·kame Aganani
An·ching chong·mot bebera·giparangde Isolni jokatako man·giminrang ong·aha. Oe, kosako chanchie nigimin gita an·ching Isolni skararako dakna man·tokaia iade ong·ja, indiba an·ching maibakai pap ka·oba, an·chingo gisik pil·na amani gisik donga. An·ching gisik pil·gija papo dongchipna man·ja, an·chingo dongkamgipa Gisik Rongtalgipaan an·chingni gisikko gisik pil·na didia aro an·ching gisik piltela. F. W. Harding, Baptist Manual…, No. 101-ni jak 86-o agana, “Kristoni mondolia Kristoo bebera·gipa gisik pil·gipa papirangni noktang ong·a.”
An·ching maikai pilak majoanirangoni aro bobilrangoni cheaniko man·enga. Gitel Jisuni ming gni kamko niatna:
1. An·ching bebera·giparangni bilgriako u·ie, Gitel Jisuan an·chingna mol·molchakgipa (Romrangna 8:31; Ibrirangna 2:17, 18; 4:14-16; 7:24-26) ong·a.
2. Pagipa Isolni mikkango Gitel Jisu an·chingna aganchakgipa ong·a (1 Johan 2:1). An·ching maibakai pap ka·ode, an·chingni gisik pil·ao pangchake, an·chingni Gitel Jisuan an·chingni paprangko kimite gala aro Paa Isolni mikkango an·chingko name rongtale rakkia. Indake an·ching Pagipa Isol, Gitel Jisu Kristo aro Gisik Rongtalgipani ka·sachakanio janggi tanggiparang ong·a.
Gitel Jisuni jokatani kamara aiao inmanpilgipa ka·saani ong·a. An·ching beberagiparang papi ong·genchimoba Ua an·chingna ka·saa aro an·chingko kema ka·e rakkienga. An·ching Uni ka·saachake rakkiani giminsa an·ching janggi tangna cholko man·enga.
No comments:
Post a Comment